Tragjedia në ditën e Krishtlindjes/ 4 anëtarët e një familje gjenden të vdekur, dyshohet se… 25/12 18:54
Një tabelë neoni e financuar nga Komiteti Amerikano-Arab Kundër Diskriminimit (ADC) është shfaqur në Times Square, në qendër të Nju Jorkut, duke shkaktuar reagime të shumta dhe debate publike.
Në tabelë shkruhen fjalët “Jezusi është palestinez” me shkronja të zeza mbi një sfond të gjelbër të ndezur, ndërsa në anën tjetër lexohet mesazhi “Gëzuar Krishtlindjet”.
Lajmi u raportua nga New York Post, i cili theksoi se kalimtarët reaguan në mënyra të ndryshme ndaj mesazhit, megjithëse shumica e komenteve ishin kritike.
Sipas drejtorit ekzekutiv kombëtar të ADC-së, Adeb Ayoub, organizata jofitimprurëse ka marrë me qira hapësirë reklamuese në Times Square që nga fillimi i këtij viti, ku shfaqen mesazhe të ndryshme që ndryshojnë çdo javë. Ai shpjegoi se tema kryesore e fushatës është “Amerika e Para”, me synimin për të nxitur dialogun dhe për të theksuar pikat e përbashkëta mes komuniteteve arabe, myslimane dhe të krishtera në Shtetet e Bashkuara, veçanërisht gjatë periudhës së festave, kur qyteti është më i frekuentuar.
“Ka shumë më tepër ngjashmëri midis arabëve, myslimanëve dhe të krishterëve në këtë vend sesa sa na është bërë të besojmë,” tha Ayoub për New York Post. Ai shtoi se shumica e amerikanëve janë të krishterë dhe se vendlindja e Krishterimit është Palestina, duke theksuar se tabela synon të nxisë reflektim dhe debat publik.
I pyetur nëse ADC kundërshton idenë se Jezusi ishte hebre, Ayoub u shpreh se çështja është “një interpretim” dhe se “Jezusi jeton në secilin prej nesh”.
Ndërkohë, ADC ka prezantuar edhe një tabelë tjetër këtë javë në Times Square me mesazhin: “Jezusi do të thoshte: ‘Rrëzojeni atë mur’”. Sipas Ayoub, një tjetër tabelë e re pritet të shfaqet në natën e Vitit të Ri, duke vazhduar serinë e mesazheve që synojnë të provokojnë diskutim publik.
Top Channel
