42 vite në shërbim të arsimit, dhjetëra breza të edukuar dhe asnjë ditë mungesë nga puna.
Por sot, në pension, mësuesi Gëzim Cala përballet me një realitet absurd: shteti e shpall debitor dhe i ul pensionin për pesë muaj kontribute që, sipas dokumenteve, janë paguar rregullisht.
Pas daljes në pension në vitin 2020, Cala zbulon se për periudha të caktuara – korrik-gusht 2013 dhe gusht, shtator, tetor 2014 – kontributet e sigurimeve shoqërore rezultojnë të “zhdukura” nga sistemi. Megjithatë, ai zotëron dokumente zyrtare që vërtetojnë se pagesat janë kryer dhe janë dërguar nga institucionet arsimore drejt tatimeve.
Për muaj të tërë, mësuesi pensionist endet nga një institucion në tjetrin, pa marrë zgjidhje. Arsimi i thotë se kontributet janë paguar dhe dorëzuar, ndërsa Tatimet pretendojnë se nuk i kanë marrë. Një ping-pong institucional, ku qytetari mbetet i vetmi humbës.
Në Drejtorinë Rajonale të Tatimeve në Durrës pranohet se problemi nuk është individual, por sistemik. Në të kaluarën, sistemet nuk komunikonin mes tyre: listë-pagesat deklaroheshin në një skedë, formularët e sigurimeve në një tjetër, dhe askush nuk u kujdes për rakordimin e të dhënave. Sot, pas prishjes së marrëveshjes së verifikimit mes institucioneve, pasojat bien mbi qytetarët që dalin në pension.
Tatimet shpjegojnë se nuk mund të korrigjojnë raste të veçanta pa u rakorduar e gjithë periudha nga institucionet përkatëse, çka e zvarrit procesin dhe e bën pothuajse të pamundur zgjidhjen për individin.
Vetëm pas ndërhyrjes së emisionit “Fiks Fare”, çështja fillon të lëvizë. Dokumentet dorëzohen fizikisht, verifikimi nis dhe autoritetet premtojnë se para Vitit të Ri do të ketë një zgjidhje për të gjithë periudhën e kontestuar.
Në fund, Gëzim Cala falënderon publikisht “Fiks Fare”, duke theksuar se ajo që nuk u zgjidh për vite me radhë në dyert e institucioneve, u bë e mundur vetëm kur u ndez kamera.
Një histori që tregon se si një qytetar i vetëm mund të humbasë përballë kaosit administrativ, por edhe se sa e domosdoshme mbetet transparenca dhe presioni publik për të vënë në lëvizje një sistem që shpesh harron njerëzit që i kanë shërbyer gjithë jetën.
Top Channel
