Një ditë para samitit të BE-së në Bruksel, politikanët belgë sulmohen nga inteligjenca ruse 17/12 19:03
Turqia po shqyrton mundësinë e kthimit të sistemit rus të mbrojtjes ajrore S-400, të blerë nga Rusia gati një dekadë më parë, si pjesë e përpjekjeve për të normalizuar marrëdhëniet me Shtetet e Bashkuara dhe për t’u ribashkuar me programin amerikan të avionëve luftarakë F-35, raportoi Bloomberg.
Sipas burimeve të cituara nga agjencia, presidenti turk Recep Tayyip Erdogan e ka ngritur këtë çështje me presidentin rus Vladimir Putin gjatë një takimi të zhvilluar javën e kaluar në Turkmenistan. Diskutime të ngjashme mes zyrtarëve të dy vendeve kanë ndodhur edhe më herët, megjithatë Kremlini ka mohuar se është paraqitur një ofertë zyrtare për kthimin e sistemit.
Raporti thekson se Ankaraja po kërkon gjithashtu rimbursim për shumën shumëmiliardë dollarëshe të paguar për S-400, me një nga opsionet që përfshin kompensim përmes blerjes së naftës dhe gazit rus. Një zgjidhje e tillë synon të shmangë përkeqësimin e marrëdhënieve me Moskën, ndërsa Turqia përpiqet të dalë nga ngërçi me Uashingtonin.
Shtetet e Bashkuara kanë ushtruar presion prej vitesh ndaj Turqisë për të hequr dorë nga sistemi S-400, duke argumentuar se ai nuk është i pajtueshëm me sistemet e NATO-s. Blerja e tij çoi në përjashtimin e Turqisë nga programi F-35 në vitin 2019 dhe, një vit më vonë, në vendosjen e sanksioneve sipas ligjit CAATSA, të cilat kufizuan aksesin e industrisë turke të mbrojtjes në teknologji amerikane të ndjeshme.
Javën e kaluar, ambasadori i SHBA-së në Turqi, Tom Barrack, deklaroi se Ankaraja ishte më afër dorëzimit të sistemit kundërajror dhe se çështja mund të zgjidhej brenda 4–6 muajsh. Megjithatë, rikthimi i Turqisë në programin F-35 mbetet i ndërlikuar, pasi varet nga miratimi i Kongresit amerikan dhe jo vetëm nga një vendim presidencial.
Ndërkohë, Ankaraja duket se po kërkon një rrugëdalje që të heqë dorë nga S-400 pa dëmtuar ekuilibrat e saj diplomatikë mes Uashingtonit dhe Moskës.
Top Channel
