Dyshohet se vrau një çift 32 vite më parë për t’i grabitur pensionin, bie në pranga 86-vjeçari 17/12 17:30
Detaje të reja tronditëse kanë dalë në dritë lidhur me vdekjen e regjisorit të njohur të filmit Rob Reiner dhe bashkëshortes së tij, fotografes Michele Singer Reiner, trupat e pajetë të të cilëve u gjetën të dielën në banesën e tyre në Brentwood, Los Angeles.
Sipas një raportimi të New York Times, që citon një person të afërt me familjen, alarmi u dha fillimisht nga një terapist masazhi, i cili kishte një takim të planifikuar në shtëpinë e çiftit, por nuk arriti të hynte brenda. Terapeuti kontaktoi vajzën e tyre, Romy Reiner, e cila jeton pranë dhe shkoi menjëherë në banesë.
Romy hyri në shtëpi dhe gjeti trupin e pajetë të babait të saj, Rob Reiner. Sipas burimit, ajo u largua e tronditur nga banesa, pa e kuptuar se trupi i nënës së saj ndodhej gjithashtu brenda. Shokja e saj e dhomës, që e shoqëronte, telefonoi shërbimet e emergjencës, ndërsa më pas ekipet e pararescue zbuluan edhe trupin e Michele Singer Reiner.
Autoritetet kanë arrestuar dhe akuzuar djalin e çiftit, Nick Reiner, 32 vjeç, për dy akuza për vrasje të shkallës së parë, si dhe për përdorimin e një arme të rrezikshme, një thikë. Ai ndodhet aktualisht në paraburgim pa të drejtë lirimi me kusht.
Burimi i cituar nga New York Times ka hedhur poshtë disa informacione të raportuara më herët nga media. Ai sqaroi se Romy u kishte thënë shërbimeve të emergjencës se Nick jetonte në një shtëpi pritjeje në pronë, por nuk e kishte përmendur atë si të dyshuar në atë moment.
Gjithashtu, janë kundërshtuar raportimet se Rob dhe Michele Singer Reiner kishin qenë të shqetësuar për sjelljen e Nick javët e fundit. Sipas burimit, familja ishte “mësuar të përballej së bashku me problemet e Nick”, duke përgënjeshtruar edhe pretendimet për sjellje “të çrregullt” të tij në një festë të organizuar nga Conan O’Brien një natë para se trupat të gjendeshin. Ai shtoi se nuk ka prova për një debat të ashpër mes babait dhe djalit.
Shefi i Policisë së Los Angelesit (LAPD), Jim McDonnell, deklaroi se mjeku ligjor ende nuk ka përcaktuar nëse vdekja e çiftit ka ndodhur vonë të shtunën apo të dielën. Megjithatë, raportime mediatike sugjerojnë se gjendja e trupave tregonte se ata kishin ndërruar jetë disa orë para se të gjendeshin.
Nick Reiner u arrestua rreth orës 21:30 të së dielës në zonën Exposition Park, rreth 24 kilometra larg banesës së familjes. Ai pritej të paraqitej në gjykatë të martën për seancën e parë, por avokati i tij, Alan Jackson, bëri të ditur se klienti i tij nuk kishte marrë ende autorizimin mjekësor dhe se paraqitja në gjykatë do të shtyhet, më herët të mërkurën.
Top Channel
