Sulmi terrorist në Australi/ Shkon në 16 numri i viktimave, mes tyre edhe një fëmijë 14/12 20:49
Benjamin Netanyahu ka bërë deklarata të ashpra kundër qeverisë australiane në deklaratat e tij të para që nga sulmi terrorist që vrau 12 persona (përfshirë një nga autorët) në plazhin Bondi të Sidneit gjatë një festimi të Hanukkah.
Kryeministri izraelit vuri në dukje se në gusht i dërgoi një letër kryeministrit australian Anthony Albanese, duke e akuzuar se po i shton benzinë ”zjarrit të antisemitizmit”.
Duke parafrazuar letrën e tij, Netanyahu vëren se politika e Albanese, e cila përfshin njohjen e një shteti palestinez, inkurajon “urrejtjen ndaj hebrenjve që tani dominon rrugët tuaja. Antisemitizmi është një kancer. Ai përhapet kur udhëheqësit heshtin. Ju duhet ta zëvendësoni dobësinë me veprime”.
Netanyahu vazhdon, duke thënë se sulmi ishte “i tmerrshëm. Vrasje me gjakftohtësi. Numri i viktimave për fat të keq po rritet me çdo minutë. Ne kemi parë thellësinë e së keqes. Ne kemi parë gjithashtu kulmin e heroizmit hebre”, thotë ai, duke treguar një kalimtar që u filmua duke u përpjekur t’i rrëmbente armën njërit prej sulmuesve.
“Ne jemi në një betejë kundër antisemitizmit global dhe e vetmja mënyrë për t’u përballur me të është ta denoncojmë dhe ta luftojmë”, vazhdon Netanyahu . “Nuk ka rrugë tjetër. Kjo është ajo që po bëjmë në Izrael. IDF dhe forcat tona të sigurisë, së bashku me qeverinë dhe popullin tonë, do të vazhdojnë ta bëjnë këtë.”
Në një sulm indirekt ndaj qeverisë australiane, Netanyahu thekson: “Ne do të vazhdojmë të denoncojmë ata që nuk denoncojnë, por inkurajojnë. Ne do të vazhdojmë të kërkojmë që udhëheqësit e kombeve të lira të bëjnë atë që kërkohet. Ne nuk do të dorëzohemi, nuk do të ulim kokën, do të vazhdojmë të luftojmë siç bënë paraardhësit tanë.”
Top Channel
