Një shqiptar nga Lezha i dënuar dy herë për grabitje shtëpish në Angli, i dëbuar dy herë dhe hyrë dy herë ilegalisht në shtetin ishull, vijon të prodhojë tituj në median e atjeshme.
Javën e shkuar prestigjiozja The Telegraph, duke analizuar videot e postuara në TikTok nga Dorian Puka, publikoi këtë shkrim ku analizohet jeta e tij e shtrenjtë.
Sipas The Telegraph, i riu shqiptar në muajt e fundit ka publikuar disa video duke mbajtur 6 ora të shtrenjta Rolex me një vlerë mbi 160.000 stërlina.
Po sipas këtij shkrimi që i referohet Top Channel, Dorian Puka shihet rrugëve të Londrës duke ngarë një makinë Lamborghini me vlerë 180.000 stërlina.
Dashuria e medias britanike me Dorian Pukën nuk mbaron këtu. Një tjetër gazetë, Daily Mail, i ka kushtuar një shkrim special shqiptarit nga Lezha.
“Fytyra e ashpër e fiaskos së azilit” është titulli i kësaj gazete, marrë shkas nga agresiviteti i Dorian Pukës kur gazetarët e Daily Mail shkuan për ta kontaktuar në shtëpinë e tij në Hounslow, në Perëndim të Londrës.
Në shkrim theksohet se, megjithëse dy herë i dënuar për grabitje shtëpish dhe i rikthyer dy herë ilegalisht në Angli, Puka nuk mund të dëbohet përsëri pasi, bazuar në Konventën Europiane të të Drejtave të Njeriut, ai ka kërkuar azil.
E në të tilla kushte, pa u shqyrtuar kërkesa nga Home Office, ai nuk mund të dëbohet dhe e gjitha kjo do të zgjasë disa vite.
Këtë të diel, gazeta më e madhe tabloide angleze The Sun on Sunday shkruan se Dorian Puka mendon se krimet e tij nuk janë serioze.
Kjo gazetë, përmes rrjeteve sociale, e ka kontaktuar Pukën duke e pyetur nëse kërkonte falje për grabitjet e kryera.
Puka, thotë The Sun on Sunday, me një anglishte të çalë është përgjigjur:
“Krime serioze? Megjithë mend e keni kur i quani krime serioze?
Unë qëndroj ligjërisht në këtë vend,” ka thënë ai.
Home Office i ka thënë The Sun se persona si Dorian Puka nuk mund të dëbohen në kushtet kur kanë bërë një kërkesë për azil.
Top Channel
