“40 vite punë në heshtje”, historia prekëse e berberit që nuk dorëzohet për të mbajtur familjen
30/11 12:45
Pas shtatë vitesh emigracion në Greqi, Lulëzim Dulla vendosi t’i rikthehej fshatit të tij të lindjes, Kurjanit në Roskovec, për t’u marrë me punën e tokës dhe blegtorinë.
Ajo që nisi thjesht me një lopë, sot është shndërruar në një fermë moderne familjare, ku Lulëzimi, së bashku me tre djemtë e tij, menaxhon rreth 90 krerë lopë dhe viça.
Falë zgjerimit të tufës dhe kujdesit të përditshëm, ferma arrin të prodhojë rreth 600 litra qumësht në ditë, të cilat shiten tek kompanitë përpunuese, duke siguruar një treg të qëndrueshëm për familjen.
“Jam Lulëzim Dulla nga Kurjani. Që prej vitit 2000, kur u ktheva nga Greqia, i jam përkushtuar blegtorisë. Fillova me një lopë dhe sot kam rreth 90 krerë lopë dhe viça, për të cilat kujdesemi familjarisht. Çdo ditë grumbullojmë rreth 600 litra qumësht dhe kemi një treg të sigurt me kompanitë përpunuese”, shprehet Dulla.
Për të siguruar ushqimin e bagëtive, Lulëzimi është detyruar të marrë me qira rreth 70 hektarë tokë, të cilat i mbjell me foragjere. Por, ashtu si shumë fermerë të zonës, ai përballet me problemin e mungesës së subvencioneve, pasi pronarët e tokave nuk paguajnë taksat dhe dokumentacioni i tyre rezulton i paplotë.
“Një nga problemet më të mëdha është se shumica e pronarëve kanë emigruar dhe tokat i kanë lënë bosh. Ne i punojmë me qira, por nuk përfitojmë subvencione sepse pronarët nuk paguajnë taksat. Nuk është e drejtë. Të paktën nafta duhet të na jepet me ndihmë nga shteti”, tha Lulëzim Dulla.
Sfida tjetër për blegtorët mbetet konkurrenca e fortë nga produktet e importit. Sipas tij, në treg hyjnë sasi të mëdha qumështi dhe nënproduktesh nga vendet e tjera, të cilat shiten me çmime shumë më të ulëta, duke vënë në vështirësi prodhimin vendas.
“Produktet që vijnë nga jashtë na ulin çmimin dhe rrisin kostot tona. Ato shiten lirë sepse shtetet e tyre i subvencionojnë, ndërsa tek ne çdo gjë është e shtrenjtë, duke filluar që nga nafta. Kjo është arsyeja pse shumë të rinj janë larguar jashtë vendit. Ndërsa produkti ynë vendas është më cilësori”, shprehet Dulla.
Në kohën kur shumë ferma të vogla po mbyllen dhe rinia largohet, familja Dulla mbetet një shembull i punës, përkushtimit ndaj tokës dhe traditës së blegtorisë në Myzeqe.
Top Channel
