Autoritetet vendore, deputetë, përfaqësues të institucioneve dhe dhjetëra qytetarë morën pjesë në homazhet për nder të bijve dhe bijave të Fierit që dhanë jetën për lirinë e vendit.
Pjesëmarrësit vendosën kurora dhe buqeta me lule në obeliskun kushtuar dëshmorëve, ndërsa atmosfera u shoqërua nga interpretimet e bandës frymore të qytetit.
Kryetari i Bashkisë Fier, Armando Subashi, në fjalën e tij u shpreh se kjo ditë është një moment reflektimi dhe mirënjohjeje për sakrificën e atyre që luftuan për lirinë.
“Sot përulemi me respekt përpara heronjve të Luftës Nacionalçlirimtare. Kjo është një ndjenjë krenarie për të gjithë ne, dhe pjesëmarrja e gjerë, pa dallim moshe, tregon se vlerat e Luftës do të vazhdojnë t’i transmetohen brez pas brezi”, u shpreh Subashi.
Ceremonia u mbyll me vendosjen e luleve nga të pranishmit dhe me tingujt solemnë të bandës së qytetit, duke rikujtuar edhe një herë sakrificën e dëshmorëve dhe rëndësinë e kësaj date historike.
Top Channel
