Një aksident i rëndë rrugor i ndodhur pasditen e së enjtes në Sorbolo të Parmës i ka marrë jetën 18-vjeçarit Francesco Ajdini, me origjinë shqiptare dhe banues në Praticello di Gattatico.
Ngjarja tragjike u regjistrua rreth orës 16:00 në via Marconi, pranë stacionit hekurudhor, përgjatë provinciales 62.
Sipas rindërtimit paraprak të dinamikës, pranë ish-qendrës Tigotà, një Fiat që po kthehej majtas është përplasur me skuterin 125 që drejtonte i riu, i cili po udhëtonte në drejtim të Reggio Emilia. Përplasja ka qenë tepër e fortë dhe, megjithëse Francesco mbante kaskë, ai është rrëzuar me forcë në asfalt.
Në vendngjarje mbërritën menjëherë ekipi i Kryqit të Kuq, autoambulanca e dërguar nga Parma dhe u ngrit në fluturim edhe helikopteri i emergjencës. Mjekët kryen manovrat e reanimimit në vend, por plagët e marra ishin tepër të rënda dhe i riu ndërroi jetë pak pas aksidentit.
Hetimet dhe verifikimet në terren u kryen nga karabinierët e Parma-s dhe të stacionit Sorbolo, të mbështetur nga policia lokale dhe zjarrfikësit.
Francesco Ajdini kishte mbushur 18 vjeç vetëm më 18 gusht. Ai jetonte me prindërit dhe motrën e tij më të madhe. Kryetari i bashkisë, Daniele Finucci – i cili e njihte familjen edhe si mjeku i tyre – shprehu ngushëllimet e tij të thella: “Një familje e ndershme dhe punëtore, ashtu si edhe Francesco. Jam i tronditur dhe u shpreh ngushëllimet më të sinqerta në emër të komunës.”
Në rrjetet sociale, në profilin e babait të viktimës, Flamur Ajdini, ende qëndrojnë fotot e festës së 18-vjetorit: Francesco duke kërcyer me shokët e tij, duke buzëqeshur pranë tortës blu dhe të rrethuar nga familjarët.
Nga autoritetet pritet të kryhen hetime shtesë për të përcaktuar me saktësi shkakun dhe përgjegjësinë e përplasjes.
Fatkeqësisht, kjo nuk është tragjedia e parë që godet familjen Ajdini. Në vitin 2004, vajza e tyre 2-vjeçare, Sara, humbi jetën po në një aksident rrugor.
Top Channel
