Negociata për planin e paqes në Ukrainë, delegacioni amerikan dhe ukrainas do të takohen sërish në fundjavë 27/11 18:27
Vladimir Putin iu tha gazetarëve se Rusia në përgjithësi pajtohet që lista e pikave të SHBA-së mbi Ukrainën mund të formojë bazën për marrëveshjet e ardhshme.
“Ne duhet ta diskutojmë seriozisht dhe fjalë për fjalë planin e paqes për Ukrainën. Njohja e sovranitetit rus mbi Krimenë dhe Donbasin duhet të jetë një nga pikat kryesore në negociatat me Shtetet e Bashkuara”, theksoi Putin, duke përsëritur skepticizmin e tij në lidhje me qeverinë ukrainase.
“Rusia dëshiron të arrijë një marrëveshje me Ukrainën, por kjo aktualisht është ligjërisht e pamundur”, tha presidenti rus, duke shtuar se vendi i tij, ndryshe nga Ukraina, mbajti zgjedhje në kohë lufte.
Presidenti rus tha se vendi i tij ishte gati të negocionte me Evropën për garanci sigurie dhe e bëri të qartë se Rusia nuk kishte ndërmend të sulmonte “Kontinentin e Vjetër”.
Putin tha gjithashtu se Rusia nuk kërkoi kurrë të bashkohej ose të kthehej në G7, “ne ishim të ftuar”, tha ai, ndërsa sqaroi se pret negociatorët amerikanë në Moskë javën e ardhshme. Në fakt, në këtë kontekst, duke iu referuar Steve Witkoff, ai tha se “mbron qëndrimet e presidentit të tij Trump”, ndërsa diskutimet me të po zhvillohen me tone të qeta, “pa fyerje dhe ekstreme”.
Diku tjetër, ai konfirmoi se Abu Dhabi është zgjedhur si vend takimi dhe negociatash midis përfaqësuesve rusë dhe ukrainas, duke shtuar se prania e një përfaqësuesi nga Uashingtoni “erdhi si surprizë”.
Kur u pyet për Sergei Lavrov dhe skenarët që e donin atë të kishte rënë në disfavor, për shkak të zhvillimit negativ të takimit të planifikuar me Trump në Budapest, Putin i mohoi kategorikisht ato dhe i përshkroi si “marrëzi”, duke thënë se Ministri i Jashtëm rus po përgatitet të takohet me negociatorët amerikanë.
Në një koment që bëri për asetet ruse që janë “të ngrira” në Europë, ai tha se sekuestrimi i tyre është “vjedhje” dhe shtoi se Moska po përgatit përgjigjen e saj.
Presidenti rus foli gjithashtu për rrjedhjet e bisedave midis këshilltarit të tij, Yuri Ushakov, dhe Steve Witkoff, duke thënë se ato mund të jenë “lajme të rreme” ose janë përgjuar.
Në fakt, ai tha se ka një “marrëdhënie shumëvjeçare” me negociatorin amerikan, duke shtuar se “do të ishte e çuditshme nëse ai do të na mallkonte me shprehje vulgare në bisedat e tij me Ushakov, veçanërisht pasi ai udhëton shpesh në Moskë”.
Top Channel
