Një operacion i përbashkët ndërkombëtar ka goditur një nga rrjetet më të mëdha të trafikut të artefakteve në Europë, i cili dyshohet se ka vjedhur mijëra objekte me vlerë të jashtëzakonshme historike nga muzetë dhe gërmimet arkeologjike në disa vende të kontinentit.
Autoritetet nga Bullgaria, Franca, Gjermania, Greqia, Italia dhe Shqipëria, të koordinuara nga Eurojust dhe Europol, arrestuan 35 persona dhe kontrolluan mbi 125 lokacione, duke sekuestruar më shumë se 3 000 objekte me një vlerë të vlerësuar mbi 100 milionë euro.
Vlera totale e mallrave të vjedhura nga grupi dyshohet të jetë rreth 870 milionë euro.
Hetimet nisën që në vitin 2020, kur policia bullgare zbuloi në një shtëpi një koleksion të jashtëzakonshëm prej 7 000 objektesh kulturore, shumica me origjinë nga civilizimet trake dhe greko-romake, disa prej të cilave datonin deri në vitin 2000 para Krishtit.
Objektet përfshinin maska antike, sende ushtarake, bizhuteri, kupa, vazo dhe monedha ari e argjendi. Mungesa e dokumentacionit të ligjshëm ngriti dyshime se bëhej fjalë për mallra të trafikuara.
Mes të arrestuarve është edhe një Objektiv me Vlerë të Lartë (HVT), i dyshuar si drejtues i operacionit kriminal. Ai akuzohet se ka financuar gërmime të paligjshme në Bullgari dhe vende të tjera fqinje, ndërsa grabitësit vepronin në emrin e tij.
Grupi kishte përfituar dokumente të dyshimta nga shtëpi ankandi dhe galeri arti në Francë, Gjermani, Britani dhe SHBA për të “legalizuar” objektet e vjedhura.ndërkombëtar
Më 19 nëntor, në Hagë, Eurojust koordinoi një “ditë të veprimit” ku pesë urdhra europianë hetimi dhe dy kërkesa për ndihmë të ndërsjellë juridike u ekzekutuan brenda disa orësh.
Në Bullgari u kryen 120 kontrolle, ndërsa veprime u ndërmorën edhe në Francë, Gjermani, Greqi dhe Shqipëri.
U sekuestruan mbi 3 000 artefakte, monedha antike ari e argjendi, vepra arti, pajisje elektronike, dokumente, 50 000 dollarë cash dhe ar investimi.
Europol dërgoi dy ekspertë në Sofje për të ndihmuar në koordinimin e operacionit dhe analizën e të dhënave.vijojnë
Autoritetet në të gjitha vendet pjesëmarrëse, përfshirë Shqipërinë përmes SPAK-ut, do të vijojnë hetimet për të identifikuar të gjitha rrugët e trafikimit dhe për të rikuperuar objektet e tjera të humbura.
Operacioni shënohet si një nga goditjet më të mëdha ndaj krimit të organizuar që merret me grabitjen dhe trafikimin e trashëgimisë kulturore në Europë.
Top Channel
