Gazetarja Anila Hoxha ka zbardhur detaje të reja nga atentati i ndodhur një ditë më parë në Rinas, ku mbeti i vrarë Gilmando Dani dhe u plagos Muçi Shaljani.
Duke folur për “Breaking” me Fiori Dardha në Top News, gazetarja tha se autoritetet e policisë janë rikthyer sot në vendngjarje për të vazhduar hetimet, teksa shton se makina Toyota që u gjet e djegur pas ngjarje, kishte targa të vjedhura në Greqi.
Sipas Hoxhës, autorët kanë pritur 8 minuta në parking dhe më pas kanë bërë pritë dhe e kanë qëlluar me kallashnikov, ndërsa njëri prej autorëve ka qëlluar me pistoletë.
Nga informacionet e gazetares, autorët e dyshuar nuk kanë pasur informator.
“Gilmando Dani tentoi të niste jetën e tij të re, pasi mbylli hesapet me drejtësinë shqiptare, në Tiranë. Nga kamerat e sigurisë u vu në dukje se ishte një atentat mjaft i organizuar dhe i sofistikuar. Në kamera u panë 3 persona por është mjaft e sigurt që nuk janë vetëm tre por më shumë. Nga mënyra si është organizuar atentati do të jetë e vështirë të dalin në një përfundim ose zbardhjen e plotë në një kohë të shkurtër”, tha gazetarja.
Top Channel
