Dy të dënuar me vdekje ekzekutohen me injeksion vdekjeprurës në Florida dhe Misuri

Dy ekzekutimet, duke përdorur kimikate vdekjeprurëse për injeksion, e çojnë numrin e ekzekutimeve në Shtetet e Bashkuara këtë vit në 37, më i larti që nga viti 2013, kur kishte 39.

Dy të tjera janë planifikuar këtë javë, në Misisipi gjatë ditës dhe në Arizona (jugperëndim) pasnesër, të premten, nga tetë të planifikuara deri më 31 dhjetor.

Në Florida, Samuel Smithers, 72 vjeç, u ekzekutua për vrasjen e dy prostitutave në vitin 1996. Viktimat, Christy Cowan dhe Denise Roach, u rrahën dhe u mbytën. Trupat e tyre u gjetën në një pronë ku ai ishte kopshtar.

Në Misuri (qendër), Lance Shockley, 48 vjeç, u ekzekutua mbrëmë për vrasjen e oficerit të policisë Carl Graham në vitin 2005. Ai këmbënguli deri në fund se ishte i pafajshëm. Oficeri i policisë, i cili po hetonte një aksident trafiku fatal që i atribuohej të pandehurit një vit më parë, u gjet i vrarë me armë zjarri para shtëpisë së tij.

Lance Shockley u dënua me vdekje pavarësisht mungesës së provave të forta, sipas mbrojtjes dhe pavarësisht se juria nuk arriti në një vendim unanim mbi dënimin. Megjithatë, Misuri është një nga shtetet e pakta të SHBA-së ku dënimi me vdekje mund të vendoset edhe pa një vendim unanim nga juria.

Shumica dërrmuese e ekzekutimeve që nga fillimi i vitit në SHBA, 31, janë kryer me injeksion vdekjeprurës.

Katër u kryen me anë të asfiksisë duke thithur azot, një metodë shumë e diskutueshme që ekspertët e OKB-së e konsiderojnë një formë “torture” dhe u përdor për herë të parë në Alabama (Jug) në vitin 2004. Dy të tjera u kryen nga skuadrat e pushkatimit në Karolinën e Jugut, para këtij viti, kjo metodë ishte përdorur në vend që nga viti 2010.

Dënimi me vdekje është hequr në 23 nga 50 shtetet amerikane. Tre të tjera – Kalifornia, Oregoni, Pensilvania – po zbatojnë një moratorium për zbatimin e tij, me vendime të guvernatorëve të tyre.

Top Channel