Të shtëna me armë jashtë një hoteli në Qipro, një ukrainas i plagosur 29/09 22:03
Kryeministri hungarez, Viktor Orbán, i njohur për qëndrimet e tij miqësore ndaj Kremlinit, ka deklaruar se “Ukraina nuk është një vend sovran”, në një kohë tensionesh të rritura mes Budapestit dhe Kievit, por edhe midis Budapestit dhe Bratislavës.
Deklarata e fortë e liderit nacionalist vjen pasi presidenti ukrainas Volodymyr Zelenskyy akuzoi Hungarinë për shkelje të hapësirës ajrore me dronë që dyshohet se ishin në mision spiunazhi në zonat kufitare të Ukrainës.
Sipas Kievit, dronët fluturuan mbi instalime industriale në rajonin perëndimor të Transkarpatisë. Ministri i Jashtëm i Hungarisë, Péter Szijjártó, mohoi përfshirjen e Hungarisë dhe akuzoi Zelenskyy për nxitje të ndjenjave anti-hungareze:
“Volodymyr Zelenskyy po bëhet çmendurisht anti-hungarez, tani ai sheh tmerre,” tha Szijjártó.
Homologu i tij ukrainas, Andrii Sybiha, reagoi duke publikuar një hartë që sipas tij tregon qartë rrugën e dronit:
“Për zyrtarët e verbër hungarezë: kjo është rruga e saktë e inkursionit të djeshëm me dron nga Hungaria në hapësirën ajrore të Ukrainës. Forcat tona të Armatosura kanë mbledhur të gjitha provat e nevojshme dhe ende po presim që Hungaria të shpjegojë se çfarë bëri ky objekt në hapësirën tonë ajrore,” shkroi ai në platformën X.
Në një intervistë të publikuar të hënën, Orbán minimizoi rëndësinë e incidentit me dronët: “Unë besoj ministrat e mi, por le të themi se ai fluturoi disa metra atje, çfarë ndodhi? Ukraina nuk është një vend i pavarur. Ukraina nuk është një vend sovran,” tha ai në një podcast të organizuar nga zëdhënësi i partisë së tij Fidesz.
Ai shtoi se Perëndimi po e mban Ukrainën “mbi ujë”: “Ne po u japim atyre armët e tyre,” tha ai, duke theksuar se Ukraina duhet të përqendrohet te kërcënimi nga Rusia dhe jo te fqinjët e saj perëndimorë të NATO-s.
“Ukraina nuk është në luftë me Hungarinë; është në luftë me Rusinë. Duhet të shqetësohet për dronët në kufirin e saj lindor. Pjesa e brendshme e Ukrainës është e sigurt. Askush nuk do ta sulmojë nga andej. Nuk mendoj se polakët, sllovakët, hungarezët apo bullgarët do ta bëjnë. Kjo është një mashtrim. Nuk ka asnjë rëndësi,” shtoi ai.
Të hënën, Hungaria ndërmori një hap hakmarrës duke bllokuar aksesin në 12 faqe lajmesh ukrainase, pasi më herët gjatë muajit Ukraina kishte bllokuar disa portale hungareze që dyshoheshin për përmbajtje pro-ruse, me kërkesë të shërbimeve të saj të sigurisë.
Orbán është një nga kritikët më të zëshëm të Ukrainës brenda Bashkimit Evropian dhe ka refuzuar t’i ofrojë ndihmë ushtarake Kievit për të përballuar agresionin rus.
Ai, së bashku me homologun sllovak Robert Fico, është ndër të paktët liderë evropianë që ka ruajtur marrëdhënie me presidentin rus Vladimir Putin pas pushtimit të Ukrainës në vitin 2022.
Kryeministri hungarez ka bllokuar gjithashtu sanksione më të ashpra ndaj Moskës dhe ka penguar përpjekjet e Ukrainës për anëtarësim në BE, duke pretenduar se integrimi i Kievit do të ishte një katastrofë ekonomike si për Hungarinë, ashtu edhe për vetë Bashkimin Evropian.
Top Channel
