Çfarë solli takimi mes Xi Jinping dhe Narendra Modit në Kinë? CNN: Lideri kinez dhe ai indian folën për miqësi ‘mes kaosit’ teksa tarifat e Trump ashpërsohen 31/08 20:02
Kabineti i Sigurisë i Izraelit pritet të mblidhet sot për të shqyrtuar planet për marrjen nën kontroll të Rripit të Gazës, ndërsa vendi përballet me presion të shtuar ndërkombëtar dhe kundërshti të paprecedentë të brendshme, madje edhe nga udhëheqësit më të lartë të sigurisë.
Megjithëse planet e ofensivës tashmë janë miratuar më herët këtë muaj nga kryeministri Benjamin Netanyahu dhe ministri i Mbrojtjes Israel Katz, takimi i sotëm synon një përditësim zyrtar për të gjithë kabinetin.
Krahas shkallëzimit ushtarak, Netanyahu dhe zyrtarët e kabinetit, përfshirë ministrin e Sigurisë Kombëtare Itamar Ben-Gvir, i njohur për qëndrimet e tij ekstreme, pritet të diskutojnë edhe një fushatë diplomatike për të frenuar njohjen ndërkombëtare të shtetit palestinez, që pritet të diskutohet në Asamblenë e Përgjithshme të OKB-së muajin e ardhshëm.
Sipas burimeve zyrtare izraelite, Netanyahu po shqyrton masa ekstreme, duke përfshirë:
-Aneksimin e plotë të Bregut Perëndimor
-Aneksimin e pjesshëm të vendbanimeve hebraike të përzgjedhura
-Vendosjen e sanksioneve ndaj Autoritetit Palestinez
Të gjitha këto masa përbëjnë shkelje të hapur të rezolutave të Këshillit të Sigurimit të OKB-së, dhe rrezikojnë të shkaktojnë pasoja të rënda diplomatike. Megjithatë, pikërisht këto kërkesa po bëhen nga aleatët e ekstremit të djathtë të Netanyahu-t në koalicionin qeverisës.
Ofensivë e re ushtarake në Gaza
Në terren, ushtria izraelite ka zhvilluar sulme të intensifikuara në dhe përreth qytetit të Gazës, si pjesë e përgatitjeve për marrjen e qytetit nën kontroll të plotë.
Vetëm të shtunën, sipas të dhënave nga spitalet palestineze, u vranë të paktën 47 persona, ndërsa një goditje izraelite shënjestroi një furrë buke të improvizuar ku strehoheshin civilë. Sipas ministrit izraelit të Mbrojtjes Katz, gjatë sulmeve u vra edhe zëdhënësi i Hamasit Abu Obaida.
“Shumë prej bashkëpunëtorëve të tij, vrasësit dhe përdhunuesit e Hamasit, do t’i bashkohen atij së shpejti”, u shpreh Katz, duke paralajmëruar për përshkallëzim të mëtejshëm.
Por sulmet po ndodhin në një moment kur situata humanitare në Gaza është në kolaps. Ministria palestineze e Shëndetësisë raportoi se shtatë persona të tjerë humbën jetën nga kequshqyerja, duke e çuar numrin e viktimave nga uria në 339.
Armëpushimi jashtë axhendës së Netanyahu-t
Një nga zërat më kritikë ndaj ofensivës në Gaza është shefi i Shtabit të Përgjithshëm të Forcave të Mbrojtjes së Izraelit (IDF), Eyal Zamir, i cili ka paralajmëruar se një sulm i tillë rrezikon pengjet që ende ndodhen në Gaza, vë në rrezik trupat izraelite dhe përkeqëson krizën humanitare.
Burime nga qeveria izraelite thanë për CNN se Zamir do t’i kërkojë kabinetit të diskutojë propozimin më të fundit për armëpushim, i ndërmjetësuar nga Katari dhe Egjipti. Ky propozim përfshin:
-Armëpushim 60-ditor
-Kthimin e 10 pengjeve të gjalla
-Lirimin masiv të të burgosurve palestinezë
Kjo ofertë, që ka marrë miratimin e Hamasit më 18 gusht, bazohet në një draft të paraqitur më herët nga emisarët amerikanë, në koordinim me Izraelin.
Megjithatë, Netanyahu ka ndryshuar strategji. Tani ai kërkon vetëm një marrëveshje të plotë, që do të çonte në lirimin e të gjithë pengjeve dhe përfundimin e luftës në kushtet e diktuara nga Izraeli.
Si pasojë, qeveria izraelite ende nuk i ka kthyer përgjigje zyrtare propozimit për armëpushim dhe nuk pritet ta diskutojë as sot në mbledhjen e kabinetit, një tregues se kjo çështje nuk është ndër prioritetet e Netanyahu-t.
Top Channel
