Erërat e forta shkaktojnë stuhi rëre në Vlorë, autoritetet bëjnë apel për kujdes gjatë qarkullimit me makinë

30/08/2025 13:21

Vlora është përfshirë gjatë ditës së sotme nga erëra shumë të forta që kanë sjellë një stuhi rëre, duke mbuluar qytetin bregdetar.

Pamjet tregojnë rrugë të mbushura me pluhur dhe shikueshmëri të ulët, ndërsa era e fortë ka krijuar vështirësi për qytetarët.

Situata është shoqëruar edhe me trafik të rënduar, pasi shumë pushues kanë zgjedhur të largohen me shpejtësi nga plazhet, duke bllokuar akset rrugore të Vlorës.

Autoritetet u bëjnë apel drejtuesve të mjeteve që të tregojnë kujdes të shtuar në qarkullim, ndërsa qytetarët këshillohen të shmangin lëvizjet e panevojshme deri në përmirësimin e kushteve atmosferike.

Top Channel