Tronditet Meksika! Trupat e një influencueseje dhe familjes së saj u gjetën brenda një kamioni, lidhjet me kartelat e drogës 29/08 18:55
Gjykata Kushtetuese ka vendosur shkarkimin e Paetongtarn Shinawatra, kryeministrja tajlandeze, duke thënë se telefonata e saj kontroverse me ish-liderin kamboxhian Hun Sen, përbënte një shkelje etike.
Paetongtarn u pezullua në korrik për shkak të një bisede telefonike të publikuar me ish-liderin kamboxhian Hun Sen, ndërsa tensionet u rritën në kufirin e të dy vendeve.
Në këtë telefonatë, ku Paetongtarn e quajte Hun Sen “xhaxha” dhe premtoi të “kujdesej” për nevojat e tij, shkaktoi zemërim publik dhe një peticion për shkarkimin e saj.
Kritikët e akuzuan gjithashtu atë për minimin e ushtrisë me ndikim politik të vendit. Ndërsa trupat tajlandeze dhe kamboxhiane u përleshën në kufi, Paetongtarn i tha Hun Sen në telefonatë se një komandant ushtarak tajlandez “thjesht donte të dukej i qetë”.
Rrjedhja e informacionit bëri që një partner kyç i koalicionit të partisë Pheu Thai të Paetongtarn të jepte dorëheqjen, dhe Paetongtarn u përball me thirrje për dorëheqje.
Ndërsa Paetongtarn e justifikoi telefonatën si një “teknikë negociuese”, ajo tha gjithashtu se nuk do të angazhohej më në bisedime private me Hun Sen.
BBC shkruan se kjo do të thotë që kryeministrja e pezulluar do të shkarkohet menjëherë nga detyra, një goditje për partinë e saj dhe dinastinë Shinawatra.
Për dekada të tëra, politika tajlandeze është dominuar nga një emër: Shinawatra.
Miliarderi i telekomunikacionit dhe ish-kryeministri tajlandez Thaksin Shinawatra erdhi në pushtet në vitin 2001 duke fituar mbështetjen e votuesve ruralë, si dhe të elitave të biznesit.
Ai ishte udhëheqësi i parë në historinë e vendit që drejtoi një qeveri të zgjedhur gjatë një mandati të plotë në detyrë.
I konsideruar si një nga personazhet më me ndikim dhe polarizues të vendit, Thaksin shkoi emigroi në vitin 2008, pasi u rrëzua nga një grusht shteti në vitin 2006.
Motra e tij, Yingluck Shinawatra, fitoi me shumicë dërrmuese zgjedhjet në vitin 2011, por më vonë u shkarkua nga Gjykata Kushtetuese, e cila vendosi se ajo kishte vepruar në mënyrë të paligjshme duke transferuar shefen e saj të sigurisë kombëtare në një pozicion tjetër.
Shinawatra-t kanë marrëdhënie të vështira me ushtrinë e Tajlandës, e cila në të kaluarën ka rrëzuar dy qeveri të Shinawatra-s në grushte shteti, si dhe me grupe të afërta me monarkinë. Por në vitin 2023 ata formuan një aleancë të pasigurt për të luftuar progresistët që kishin fituar mbështetje të gjerë midis tajlandezëve.
Top Channel
