Tronditet Meksika! Trupat e një influencueseje dhe familjes së saj u gjetën brenda një kamioni, lidhjet me kartelat e drogës 29/08 18:55
Minneapolis është ende në zi pas sulmit të përgjakshëm ndaj një shkolle katolike, ku dy fëmijë u vranë dhe të paktën 18 persona të tjerë mbetën të plagosur.
Viktimat janë identifikuar si Harper Moyski, 10 vjeçe, dhe Fletcher Merkel, 8 vjeç, të cilët u qëlluan për vdekje gjatë meshës në kishën “Annunciation Catholic Church”.
Familjarët e tyre kanë dhënë deklarata prekëse, duke ndarë kujtimet e fundit me fëmijët dhe duke kërkuar veprim kundër dhunës me armë.
“Dje, një burracak vendosi të na marrë djalin tonë 8-vjeçar, Fletcher,” tha babai i tij, Jesse Merkel, mes lotësh në një konferencë për shtyp. “Mos e kujtoni për mënyrën se si u nda nga jeta, por për fëmijën e dashur që ishte.”
Merkel tha se djali i tij dashuronte sportet, gatimin dhe peshkimin – çdo aktivitet që e mbante aktiv dhe pranë familjes. Ai shtoi se shpreson që të plagosurit, sidomos fëmijët, të mund të shërohen emocionalisht dhe të gjejnë forcën për të jetuar jetë të mbushura me dashuri.
Familja ka në plan të krijojë një fond bursash në emër të Fletcher.
Nga ana tjetër, prindërit e Harper Moyski, Michael Moyski dhe Jackie Flavin, e përshkruan vajzën si një fëmijë “plot dritë, gaz dhe dashuri”.
“E motra e vogël e Harper e adhuronte atë dhe tani po përjeton një humbje të paimagjinueshme. Si familje, jemi të shkatërruar”, thanë ata.
Familja Moyski kërkoi që kujtimi i Harper-it të shërbejë si frymëzim për të ndalur dhunën me armë në SHBA: “Ndryshimi është i mundur dhe i domosdoshëm – që historia e Harper-it të mos bëhet thjesht një statistikë tjetër tragjike.”
Pamjet nga vendngjarja dhe rrëfimet e dëshmitarëve kanë tronditur opinionin publik. Në mesin e të plagosurve janë 15 fëmijë të moshës 6 deri në 15 vjeç, si dhe 3 të moshuar mbi 80 vjeç. Të paktën një person ndodhet në gjendje kritike në spital.
Vigane janë mbajtur në të gjithë qytetin e Minneapolis dhe në St. Paul, ndërsa flamujt janë ulur në gjysmështizë. Edhe para ndeshjes së bejzbollit mes Minnesota Twins dhe Toronto Blue Jays, u mbajt një minutë heshtje në nder të viktimave.
Policia ende nuk ka zbuluar një motiv të qartë për sulmin, por ka bërë të ditur se autori kishte qëndrime ekstremiste anti-fetare dhe kishte ndjekur më parë të njëjtën shkollë.
Nëna e autorit, një ish-punonjëse e shkollës, nuk ka reaguar ende ndaj thirrjeve të autoriteteve.
Top Channel
