Jessie J shtyn turneun në Mbretërinë e Bashkuar dhe Evropë për t’iu nënshtruar operacionit të dytë për kancerin e gjirit 29/08 11:35
Largimi i detyruar i një shkencëtareje dhe ardhja e një aleati politik! Çfarë po ndodh në krye të CDC-së?
Shtëpia e Bardhë ka zgjedhur Jim O’Neill, zëvendëssekretar i Departamentit të Shëndetësisë dhe Shërbimeve Njerëzore (HHS), për të drejtuar përkohësisht Qendrat për Kontrollin dhe Parandalimin e Sëmundjeve në SHBA (CDC).
Emërimi vjen mes një përplasje të ashpër institucionale për shkarkimin e drejtoreshës së sapoemëruar, Susan Monarez, e cila ka refuzuar të largohet nga posti.
Monarez, një specialiste e sëmundjeve infektive dhe e konfirmuar nga Senati vetëm një muaj më parë, u shkarkua në mënyrë të papritur të mërkurën nga HHS, pa dhënë arsye zyrtare. Por përmes avokatëve të saj, ajo ka kundërshtuar vendimin duke deklaruar se, si zyrtare e emëruar nga presidenti dhe e konfirmuar nga Senati, vetëm presidenti Donald Trump mund ta shkarkojë.
“Vetëm presidenti mund ta shkarkojë atë. Njoftimi i marrë është ligjërisht i pavlefshëm. Monarez mbetet drejtoreshë e CDC,” – tha avokati i saj Mark Zaid në një deklaratë në rrjetin social Bluesky.
Në një reagim të menjëhershëm, zëdhënësi i presidentit Trump, Kush Desai, tha: “Susan Monarez nuk është e përputhshme me agjendën e presidentit për një Amerikë të shëndetshme. Meqë ajo refuzoi të dorëhiqej, Shtëpia e Bardhë e ka larguar nga detyra.”
Vendimi për ta zëvendësuar Monarez-in me Jim O’Neill ka shkaktuar valë dorëheqjesh në nivelet më të larta të CDC-së. Katër zyrtarë të lartë – përfshirë shefin mjekësor dhe drejtuesin e sigurisë së vaksinave – dhanë dorëheqje në shenjë proteste, duke akuzuar administratën për ndërhyrje politike, shpërndarje dezinformatash dhe shkurtime të rrezikshme në buxhetin e shëndetësisë.
Jim O’Neill, për dallim nga Monarez, nuk ka përvojë shkencore apo mjekësore. Ai ka qenë më parë zyrtar në administratën e George W. Bush dhe ka punuar për investitorin miliarder dhe donatorin konservator Peter Thiel. O’Neill është kritik i CDC-së, veçanërisht për trajtimin e pandemisë Covid-19, dhe mbështet politikën e Robert F. Kennedy Jr. për të kufizuar përdorimin e vaksinave.
Kennedy, i cili mbikëqyr CDC-në në rolin e tij aktual, është i njohur për qëndrimet e tij anti-vaksinë. Ai ka shkurtuar fondet për kërkimin mjekësor dhe ka larguar ekspertët shkencorë nga pozicionet kyçe. Të mërkurën, ai gjithashtu vendosi kufizime të reja për përdorimin e vaksinave kundër Covid-19 në SHBA.
Përplasja mes Monarez dhe administratës është thelluar pas vendimit të saj për të mos zbatuar urdhra të cilësuar si të rrezikshëm dhe joshkencorë.
Avokatët e saj deklaruan: “Kur Susan Monarez refuzoi të vuloste direktiva të rrezikshme politike dhe të shkarkonte ekspertë të shëndetit publik, ajo zgjodhi të mbrojë jetën e qytetarëve mbi një agjendë politike. Për këtë arsye, u bë objektiv.”
Tensionet u shtuan edhe më tej pas ngjarjes tragjike të këtij muaji në selinë e CDC-së në Atlanta, ku një person i armatosur vrau një oficer policie. Zyrtarët shprehën zemërim për mënyrën si u menaxhua situata nga administrata.
Ndër dorëheqjet e zyrtarëve të lartë të CDC janë:
Dr. Debra Houry, shefe mjekësore;
Dr. Daniel Jernigan, përgjegjës i sigurisë së vaksinave;
Dr. Jennifer Layden, drejtuese e zyrës së të dhënave për shëndetin publik;
Dr. Demetre Daskalakis, përgjegjës për rekomandimet mbi vaksinat.
Jernigan deklaroi për Reuters dhe Washington Post se u detyrua të rishikojë dhe ndryshojë të dhëna të sigurisë së vaksinave, përfshirë pretendimin e rremë se vaksinat shkaktojnë autizëm. Ai tha se ishte udhëzuar nga ndihmësit e Kennedy-t, Lyn Redwood dhe David Geier – të dy aktivistë anti-vaksinë.
Reagimet politike nuk munguan. Senatori Bernie Sanders e quajti përpjekjen për të shkarkuar Monarez “të turpshme” dhe kërkoi një seancë dëgjimore.
Senatorja Elizabeth Warren shpërndau një video të O’Neill nga dëgjimi i tij në Senat, ku ai vlerësonte Robert F. Kennedy Jr. për trajtimin e një shpërthimi të frikshëm të fruthit në Teksas, duke komentuar:
“Donald Trump po pastron drejtuesit e CDC-së dhe po vendos një njeri që mendon se Kennedy po bën një ‘punë të shkëlqyer’ ndërsa fruthi përhapet me ritme rekord. Këta njerëz janë rrezik për shëndetin publik.”
Top Channel
