Gjykata Supreme e Kosovës ka hedhur poshtë ankesën e Lëvizjes Vetëvendosje kundër vendimit të PZAP-së për certifikimin e Listës Serbe për pjesëmarrje në zgjedhjet lokale të 12 tetorit.
“Meqenëse nuk ka asnjë bazë ligjore që e lejon apo i jep të drejtë një anëtar individual të KQZ-së, që në cilësinë e anëtarit të jetë palë në procedurë gjyqësore në rastet kur eventualisht atakohen vendimet e KQZ-së, si institucion, atëherë Gjykata Supreme konstatoi se ankesa e parashtruar nga ankuesit, është e palejuar”, thuhet në aktvendim.
Dy anëtarët e Komisionit Qendror të Zgjedhjeve nga radhët e Lëvizjes Vetëvendosje, Sami Kurteshi dhe Alban Krasniqi kishin kërkuar anulimin e vendimit të Panelit Zgjedhor për Ankesa dhe Parashtresa, i cili e obligonte KQZ-në ta certifikonte Listën Serbe.
Me 24 gusht PZAP, nxorri këtë vendim, pasi në mbledhjen e KQZ-së të datës 21 gusht, Lista Serbe nuk u certifikua për pjesëmarrje në zgjedhjet lokale.
Një vendim i tillë ishte kritikuar nga vendet e QUINT-it dhe Bashkimi Evropian, të cilat i bënë thirrje Qeverisë në detyrë dhe partive politike të mos ndërmarrin ndonjë hap tjetër për ta penguar regjistrimin e Listës Serbe për zgjedhjet e tetorit.
Top Channel
