Nuk ka përballje Putin-Zelensky deri sa të bihet dakord për axhendën, ministri i jashtëm rus: Takohemi kur… 22/08 14:45
Një gjykatë federale në Shtetet e Bashkuara ka urdhëruar ndalimin e menjëhershëm të transferimit të emigrantëve të rinj në një kamp të përkohshëm ndalimi në Everglades, Florida, i njohur me emrin “Alligator Alcatraz”, duke urdhëruar gjithashtu largimin e të gjithë infrastrukturës shtesë të ndërtuar aty.
Vendimi u mor nga Gjykatësja federale Kathleen Williams, pas një padie të paraqitur nga grupe ambientaliste dhe fiset autoktone të Amerikës, të cilat argumentuan se prania e këtij kampi përbën një kërcënim serioz për mjedisin dhe ekosistemin delikat të zonës.
Në urdhrin e saj, gjykatësja thekson se brenda 60 ditëve duhet të hiqen gjeneratorët, ndriçimi, gardhet mbrojtëse dhe sistemet e ujërave të zeza që janë vendosur për të mbështetur funksionimin e kampit.
Kush është përgjegjës për “Alligator Alcatraz”?
Kampi është ndërtuar në një pistë të vjetër fluturimi, me trailerë të emergjencës dhe çadra, të rrethuar me gardh, dhe ndodhet më pak se 2 orë nga Miami.
Por edhe pse autoritetet e shtetit të Floridës pretendojnë se kampi operohet përmes një marrëveshjeje mes agjencive shtetërore dhe ICE (Agjencia Federale për Emigracionin dhe Doganat), nuk është ende e qartë se kush e ka kontrollin përfundimtar – gjë që ka ngritur shqetësime serioze për mungesën e përgjegjshmërisë dhe mbikëqyrjes.
Kampi nën kritika
“Alligator Alcatraz” ka qenë në qendër të kritikave që nga krijimi i tij. Ligjvënës që kanë vizituar vendin kanë raportuar kushte të papranueshme, me emigrantë të mbajtur në kafaze, nën temperatura të larta, insekto-infeksione dhe ushqime të pamjaftueshme.
Sipas urdhrit të gjykatës, asnjë emigrant i ri nuk mund të dërgohet në këtë kamp, ndërsa pritet që ai të mbyllet përfundimisht në mënyrë graduale, teksa emigrantët aktualë largohen.
Reagime dhe kundërshti
Fisi Miccosukee, që jeton pranë zonës dhe është një nga paditësit, ka mirëpritur vendimin. Po ashtu, grupet ambientaliste, përfshirë organizatën “Friends of the Everglades”, e kanë cilësuar vendimin si fitore për mjedisin dhe të drejtën e komuniteteve lokale për të mbrojtur tokat e tyre.
Kongresistja demokrate Frederica Wilson, përmes një reagimi në rrjetin X (ish-Twitter), ka shkruar: “Ishte mizor, i pakujdesshëm dhe shkatërrues që nga fillimi. Jam e lumtur që po mbyllet dhe s’duhet të ndodhë kurrë më!”
Ndërkohë, zyrtarë të shtetit të Floridës kanë njoftuar se do të apelojnë vendimin e gjykatës, ndërsa një përfaqësues i guvernatorit Ron DeSantis tha se “deportimet do të vazhdojnë derisa morali të përmirësohet”, një koment që ka shkaktuar reagime të forta në publik.
Një proces gjyqësor tjetër në pritje
Kjo nuk është e vetmja padi ndaj kampit, një tjetër proces gjyqësor është në zhvillim dhe ka të bëjë me mungesën e aksesit ligjor për emigrantët e ndaluar.
Top Channel
