Në prag të takimit në Alaska, Trump bisedime me liderët e BE-së. Putin i telefonon…Kim Jong Unit

Bisedimet zhvillohen para takimit të Trump me presidentin rus Vladimir Putin në Alaska të premten.

Kancelari gjerman Friedrich Merz tha dje se po planifikonte të organizonte një takim virtual me Trump, presidentin ukrainas Volodymyr Zelensky dhe udhëheqësit evropianë për të diskutuar luftën në Ukrainë.

Meqë samiti Trump-Putin pritet të anashkalojë Ukrainën dhe Evropën, qeveria gjermane njoftoi të hënën se po përgatitej për një takim të saj për të planifikuar “bisedime të mundshme paqeje” dhe “pretendime territoriale” të mundshme.
“Bisedimet do të përqendrohen në opsione të tjera për të ushtruar presion ndaj Rusisë,” tha qeveria gjermane.
Merz ftoi në takim udhëheqësit e Francës, Mbretërisë së Bashkuar, Finlandës, Italisë, Polonisë dhe Ukrainës, si dhe presidenten e Komisionit Evropian Ursula von der Leyen, sekretarin e përgjithshëm të NATO-s Mark Rutte, Trump dhe zëvendëspresidentin e tij JD Vance.

Ndërkohë në kampin tjetër, Vladimir Putin dhe udhëheqësi i Koresë së Veriut, Kim Jong Un, diskutuan në telefon dje për samitin e ardhshëm të presidentit rus me Donald Trump, sipas mediave shtetërore ruse Tass.

“Presidenti rus ndau gjithashtu me Kim Jong Un informacione në kuadër të bisedimeve të tij të ardhshme me presidentin amerikan Donald Trump,” tha shërbimi për shtyp i Kremlinit, sipas Tass.

Gjatë bisedës, Putin raportohet se e falënderoi sërish Kim-in për mbështetjen e Phenianit në luftën e vazhdueshme në Ukrainë.

“Presidenti rus e vlerësoi shumë sërish mbështetjen e dhënë nga (Republika Popullore Demokratike e Koresë) dhe guximin, heroizmin dhe shpirtin e vetëflijimit të treguar nga pjesëtarët e Ushtrisë Popullore të Koresë në çlirimin e Kurskut, pjesë e territorit rus,” raportoi agjencia shtetërore koreano-veriore KCNA.

Korea e Veriut ka mbështetur Rusinë në luftën kundër Ukrainës duke dërguar trupa dhe furnizuar me armë për të forcuar përpjekjet e saj. Një vlerësim i inteligjencës ukrainase, i parë nga CNN në korrik, tha se Korea e Veriut pritet të dërgojë deri në 35,000 trupa shtesë për të luftuar me Rusinë — trefishi i numrit të dislokuar më parë.

Korea e Veriut ka forcuar lidhjet me Rusinë vitet e fundit, duke nënshkruar vitin e kaluar një traktat për partneritet strategjik gjithëpërfshirës, i cili shërbeu si bazë për dërgimin e trupave të Phenianit në Rusi.

Putin dhe Kim zhvilluan bisedën telefonike për të shënuar 80-vjetorin e çlirimit të Koresë nga kolonializmi japonez, thanë mediat shtetërore në të dy vendet.

Dy udhëheqësit janë dakorduar të kenë “kontakte më të ngushta në të ardhmen,” sipas KCNA.

Top Channel