Azerbajxhani dhe Armenia nënshkruajnë marrëveshjen historike për paqen, Trump: Më në fund ja dolëm 08/08 22:52
Donald Trump ka thënë se javën e ardhshme do të takohet me Vladimir Putinin për të diskutuar luftën në Ukrainë dhe se një përfundim i konfliktit më shumë se tre vjeçar do të duhet të përfshijë “disa shkëmbime territoriale”.
Trump tha se planifikon të takohet me presidentin rus të premten e ardhshme në Alaskë. Ai e njoftoi vendndodhjen në një postim të shkurtër në platformën e tij Truth Social.
Më herët gjatë ditës, Trump u tha gazetarëve në Shtëpinë e Bardhë se takimi “do të ishte bërë më herët, por mesa duket ka marrëveshje sigurie që fatkeqësisht njerëzit duhet t’i bëjnë”.
Presidenti amerikan shtoi gjithashtu se “do të ketë disa shkëmbime territoriale për të mirën e të dyve” Ukrainës dhe Rusisë dhe se kjo çështje do të diskutohet së shpejti, por nuk dha detaje të mëtejshme.
Bloomberg raportoi të premten se marrëveshja mund të vulosë disa nga fitimet territoriale të Putinit në Ukrainë, duke ngrirë në praktikë vijat e frontit në rajonet Kherson dhe Zaporizhia. Putini ka pretenduar katër rajone ukrainase në tërësi, megjithëse një pjesë e madhe e tyre mbetet nën kontrollin ukrainas.
Zyrtarë amerikanë dhe rusë po punonin mbi një marrëveshje sipas së cilës Rusia do të ndalte ofensivën në këmbim të koncesioneve territoriale – një propozim politikisht i ndjeshëm në Ukrainë, tha Bloomberg.
Komentet e Trump-it erdhën pasi kryeministri i Polonisë tha se një “ngrirje” e konfliktit mund të jetë pranë, pas një bisede me liderin ukrainas, Volodymyr Zelenskyy, i cili ka komunikuar me Trump dhe liderë evropianë ditët e fundit.
“Ka disa sinjale, dhe ne kemi gjithashtu një intuitë, se ndoshta një ngrirje e konfliktit – nuk dua të them fundi, por ngrirja e konfliktit – është më afër se sa e largët,” tha Donald Tusk në një konferencë shtypi. “Ka shpresa për këtë.”
Tusk tha se Zelenskyy ishte “shumë i kujdesshëm, por optimist” për armëpushimin, raportoi Reuters. Ukraina dëshiron që Polonia dhe vende të tjera evropiane të luajnë një rol në planifikimin e armëpushimit dhe marrëveshjes përfundimtare të paqes, shtoi ai.
Trump më parë ka shprehur gatishmërinë e tij për t’u takuar me Putinin kokë më kokë, pa parakushte, përfshirë negociata të drejtpërdrejta mes Putinit dhe Zelenskyy-t, duke nxitur frikën se Ukraina mund të lihet jashtë kornizës së negociatave për një armëpushim të mundshëm.
Nëse samiti ndodh, do të ishte samiti i parë SHBA-Rusi që nga viti 2021, kur ish-presidenti Joe Biden u takua me Putinin në Gjenevë.
Zelenskyy ka reaguar duke biseduar me liderë evropianë, përfshirë kancelarin gjerman, Friedrich Merz, dhe presidentin francez, Emmanuel Macron, të cilët janë ura të rëndësishme komunikimi me Trump-in.
I dërguari amerikan Steve ëitkoff kishte propozuar një takim trepalësh me Trump, Putinin dhe Zelenskyy-n, por Kremlini e kishte injoruar këtë sugjerim, tha këshilltari i Putinit, Yuri Ushakov, duke theksuar se ishte “i fokusuar në përgatitjet për një takim dypalësh me Trump-in në radhë të parë”.
Putini ka thënë se nuk është gati të takohet me Zelenskyy-n, edhe pse Kremlini pretendon se përgatitjet për një samit dypalësh me Trump-in javën e ardhshme janë duke u zhvilluar.
“Unë nuk kam asgjë kundër në përgjithësi, është e mundur, por duhet të krijohen disa kushte për këtë,” tha Putini për një takim me Zelenskyy-n. “Por fatkeqësisht, ende jemi larg krijimit të këtyre kushteve.”
Muajin e kaluar, Trump i dha Putinit një ultimatum për të rënë dakord për armëpushim ose për t’u përballur me sanksione dytësore, me afatin e vendosur për këtë të premte. Ky afat dukej ende në fuqi pavarësisht planeve për samitin, megjithëse Shtëpia e Bardhë nuk ka thënë se çfarë masash dytësore mund të zbatojë.
Këtë javë, Trump vendosi një rritje prej 25% të tarifave ndaj Indisë për blerjen e naftës ruse, duke veçuar një nga mbështetësit ekonomikë të Moskës – një lëvizje për të cilën Nju Delhi u ankua se ishte e padrejtë dhe selektive.
Trump u irritua publikisht me Putinin muajt e fundit, ndërsa lufta ka hyrë në vitin e tretë dhe Putini vazhdon të hedhë raketa dhe dronë çdo natë mbi qytetet ukrainase, pavarësisht pretendimit të Trump-it se ai mund të arrinte një marrëveshje brenda 24 orëve nga marrja e postit të presidentit.
“Putini … flet mirë dhe pastaj bombardojnë të gjithë në mbrëmje,” tha Trump muajin e kaluar. “Pra, ka pak problem aty.”
Top Channel
