Izraeli sulmon kryeqytetin e Jemenit, mediat izraelite raportojnë se sulmi eliminoi të gjithë udhëheqësit e Houthive 29/08 22:21
Presidenti Trump ka nënshkruar një urdhër ekzekutiv që rrit tarifat për mallrat kanadeze nga 25% në 35%, për të gjitha produktet që nuk mbulohen nga marrëveshja tregtare SHBA-Meksikë-Kanada, bëri të ditur Shtëpia e Bardhë.
Ky hap – që Uashingtoni e lidhi pjesërisht me atë që e quajti dështimi i Kanadasë për të ndalur kontrabandën e fentanilit – përbën goditjen më të fundit në një luftë tarifore që ka zgjatur prej muajsh dhe që Trump e nisi menjëherë pas marrjes së detyrës.
Njoftimi, i cili akuzon Kanadanë për “mosveprim të vazhdueshëm dhe hakmarrje”, vjen pasi Trump deklaroi se kryeministri kanadez Mark Carney ishte përpjekur të kontaktonte, por nuk kishte pasur ndonjë bisedë mes tyre.
Më herët të enjten, Trump tha se do të ishte “shumë e vështirë” të arrihej një marrëveshje me Kanadanë pasi kjo e fundit kishte shprehur mbështetje për shtetësinë palestineze.
Zyra e Carney-t nuk iu përgjigj menjëherë një kërkese për koment.
Zyrtarët në Otava kanë theksuar në mënyrë të përsëritur se vetëm një sasi shumë e vogël e fentanilit që hyn në SHBA e ka origjinën nga Kanadaja, por shteti tashmë ka marrë masa për forcimin e sigurisë në kufi.
Carney u tha gazetarëve në qershor se nëse dy vendet nuk arrijnë një marrëveshje tregtare deri më 1 gusht, Kanadaja ka gjasa të vendosë kundërmasa të reja ndaj eksporteve amerikane të çelikut dhe aluminit.
Top Channel
