Meksika kërkon riatdhesimin e shtetasve të saj nga “Alcatrazi me aligatorë” në SHBA 30/07 22:50
Më shumë se gjysma e tokës në Evropë dhe rajonin e Mesdheut (52%) u prek nga thatësira në fillim të korrikut, sipas një analize të AFP-së mbi të dhënat më të fundit të Observatorit Evropian të Thatësirës (EDO).
Kjo përfaqëson përqindjen më të lartë të regjistruar ndonjëherë për periudhën 1–10 korrik, që nga fillimi i matjeve në vitin 2012. Ky nivel është gjithashtu 21 pikë përqindjeje mbi mesataren për të njëjtën periudhë gjatë viteve 2012–2024. Megjithatë, niveli i thatësirës ka shënuar një rënie të lehtë krahasuar me dhjetëditëshin e fundit të qershorit, kur u shënua rekordi historik prej 55.5% të tokës së prekur në rajonet evropiane dhe mesdhetare.
Indeksi Evropian i Thatësirës i projektit Kopernik, i bazuar në vëzhgime satelitore, përfshin tre parametra: Sasinë e reshjeve, lagështinë e tokës dhe gjendjen e bimësisë. Ky indeks ndahet në tre nivele, vëzhgim, paralajmërim dhe alarm.
Evropa Lindore më e prekur
Evropa Lindore është rajoni më i prekur. Në Kosovë, Serbi dhe Bullgari, pothuajse 100% e territorit është nën ndikimin e thatësirës, ndërsa më shumë se një e treta e tokës ndodhet në gjendje alarmi. Në Bullgari, ndërprerjet e furnizimit me ujë prekën mbi 156,000 banorë në mes të korrikut, për shkak të reduktimit të vazhdueshëm të burimeve ujore çdo vit.
🚱#Drought conditions worsened across central & eastern Europe in late June.
Alert levels in 🇺🇦 Ukraine, 🇭🇺 Hungary, the Balkans, Türkiye 🇹🇷 & parts of 🇬🇧 🇫🇷 🇷🇺.
⚠️Prolonged drought persists in the SE Mediterranean, Middle East & N. Africa.
More: https://t.co/kIKfkLH5si pic.twitter.com/dDN4e7m3n9
— Copernicus EMS (@CopernicusEMS) July 22, 2025
Në Hungari, pothuajse gjysma e vendit (47%) ishte në nivel paralajmërimi në fillim të korrikut – një rritje e ndjeshme krahasuar me fundin e qershorit, kur kjo shifër ishte 21%.
Thatësira ka prekur rëndë edhe Mesdheun Lindor. Në Armeni, 95% e territorit është prekur, ndërsa në Turqi, ku 77% e tokës është e prekur, situata është përkeqësuar nga erërat e forta, duke nxitur shpërthimin e qindra zjarreve.
Siria dhe kriza ushqimore
Rreth gjysma e territorit të Sirisë është aktualisht e prekur nga thatësira, e cila kërcënon korrjet e grurit dhe vë mbi 16 milionë njerëz në rrezik të pasigurisë ushqimore gjatë këtij viti, sipas Kombeve të Bashkuara.
Situatë e përzier në Evropën Perëndimore
Në Evropën Perëndimore, situata paraqitet e ndryshme nga vendi në vend. Në Mbretërinë e Bashkuar, 18% e territorit është në nivel paralajmërimi – një rritje me më shumë se 6 pikë përqindjeje nga fundi i qershorit. Edhe Franca është prekur ndjeshëm, me 12% të territorit në nivel paralajmërimi, kryesisht në pjesën perëndimore të vendit. Në total, dy të tretat e territorit francez janë prekur nga thatësira.
Ndër të tjera, Spanja dhe Portugalia mbeten ndër vendet më pak të prekura, me përqindje shumë të ulëta të territorit nën ndikimin e thatësirës – përkatësisht 6% dhe 1%.
Top Channel
