Kanadaja ndjek Francën dhe Britaninë, planifikon të njohë shtetin e Palestinës 31/07 07:59
Republika Çeke ka ndërmarrë një hap historik duke barazuar ligjërisht propagandën komuniste me atë naziste.
Presidenti Petr Pavel ka firmosur një ndryshim në Kodin Penal, i cili e vendos komunizmin në të njëjtin nivel ligjor me nacionalsocializmin, duke hapur rrugën për ndalimin e partive apo lëvizjeve që propagandojnë ideologji që shtypin liritë dhe të drejtat e njeriut.
Ligji i ri, që hyn në fuqi më 1 janar 2026, parashikon dënime deri në pesë vjet burg për këdo që themelon, mbështet apo përhap lëvizje me ideologji totalitare që nxisin urrejtje racore, etnike, fetare apo klasore. Nisma u shty përpara nga lëvizja qytetare “Nëntori nuk ka mbaruar ende”, e udhëhequr nga Martin Mejstrik – një figurë kyçe e “revolucionit të kadifenjtë” të vitit 1989 – dhe u mbështet nga qeveria proevropiane e kryeministrit Petr Fiala.
Historianë të Institutit për Studimin e Regjimeve Totalitare e kanë quajtur këtë një hap drejt drejtësisë historike. Por ky zhvillim ka shkaktuar debat të ashpër në vend, ku Partia Komuniste e Bohemisë dhe Moravisë ka ende mijëra anëtarë dhe një ndikim të konsiderueshëm politik.
Pas zgjedhjeve evropiane 2024, ajo hyri në Parlamentin Evropian si pjesë e koalicionit “Stacilo!” dhe pritet të garojë me sukses edhe në zgjedhjet parlamentare të tetorit 2025. Ish-kryeministri Andrej Babis, favorit për të fituar ato zgjedhje, nuk e ka përjashtuar mundësinë e bashkëpunimit me këtë koalicion, duke deklaruar se “për mua, ata nuk janë komunistë”.
Megjithatë, ligji i ri mund të vendosë partine komuniste në të njëjtën pozitë me Partinë e Punës Çeke, e cila u shpërbë në vitin 2010 për përhapje të ideologjisë naziste.
Kryetarja e komuniosteve dhe eurodeputetja Katerina Konecna e cilësoi ligjin si një sulm politik nga koalicioni qeverisës dhe përpjekje për të heshtur opozitën.
Top Channel
