Negociatat Rusi-Ukrainë në Stamboll, pala ukrainase propozoi një samit mes Zelenskyt dhe Putin 23/07 23:06
Bashkimi Evropian po kërcënon të vendosë tarifa ndëshkuese me vlerë gati 100 miliardë euro për produktet amerikane – nga uiski te avionët Boeing – nëse Presidenti Donald Trump nuk bie dakord për një marrëveshje tregtare deri në fund të javës së ardhshme.
Sipas gazetës Guardian, Komisioni Evropian njoftoi të mërkurën se synon të bashkojë dy lista të produkteve amerikane që ishin përgatitur tashmë në të kaluarën, me qëllim që t’i përfshijë ato në kundërmasat e mundshme kundër tarifave të importit që Trump kërcënon të vendosë.
Listat në fjalë përfshijnë mallra me vlerë 21 miliardë euro (produkte shpendësh, alkool) dhe 72 miliardë euro të tjera (makina, avionë). Nëse propozimi miratohet nga shtetet anëtare të BE-së përmes një votimi që pritet në ditët në vijim, tarifat do të hyjnë në fuqi më 7 gusht.
“Prioriteti ynë është zbatimi” , thotë Komisioni.
Përfaqësuesi tregtar i Komisionit Evropian, Olof Gill, tha se qëllimi i BE-së mbetet arritja e një marrëveshjeje me SHBA-në, por shtoi se “ne vazhdojmë të përgatitemi për të gjitha eventualitetet”. Bashkimi i dy listave, tha ai, synon t’i bëjë kundërmasat “më të qarta, më të thjeshta dhe më të forta”.
Komisioneri i Tregtisë i BE-së, Maroš Šefčovič, ishte planifikuar të zhvillonte një video-konferencë me Sekretarin e Tregtisë të SHBA-së, Howard Latnick, përpara se të informonte ambasadorët e BE-së të mërkurën pasdite. Brukseli ngurtëson qëndrimin pas kërcënimeve të reja të Trump.
Burime diplomatike thonë se klima në Bruksel ka ndryshuar ndjeshëm, veçanërisht pas refuzimit të një marrëveshjeje paraprake nga Trump dhjetë ditë më parë dhe kërcënimit të tij të mëvonshëm për të vendosur tarifa prej 30% për të gjitha importet nga BE-ja që nga 1 gushti.
Gjermania, e cila kishte mbështetur një marrëveshje të shpejtë për të hequr tarifat ekzistuese prej 27.5% që po ndikojnë rëndë në industrinë e saj të makinave, tani mbështet aktivizimin e ” Instrumentit Kundër Detyrimit ” ( ACI ) , i cili përshkruhet si “arma bërthamore” e BE -së kundër presionit ekonomik nga vendet e treta.
ACI i lejon BE-së të përgjigjet jo vetëm me tarifa, por edhe me një ndalim të shërbimeve – një goditje që do të ndikonte veçanërisht në sektorin amerikan të teknologjisë.
Goditje ndaj industrisë dhe kritika për mosveprim
Industria evropiane e makinave tashmë është goditur rëndë . Stellantis , kompania mëmë e Jeep dhe Vauxhall , tha këtë javë se kishte pësuar një humbje prej 300 milionë eurosh nga tarifat, ndërsa Volvo raportoi një rënie të ndjeshme në rezultatet operative të tremujorit të dytë.
Presidenti francez Emmanuel Macron ka theksuar prej kohësh nevojën për një përgjigje të fortë të BE-së ndaj kërcënimeve të Trump , dhe të premten e kaluar si Franca ashtu edhe Gjermania ngritën hapur çështjen e aktivizimit të ACI-së në një takim të ambasadorëve.
“Ka pasur vërtet një ndryshim toni, por nuk është e qartë nëse ata me të vërtetë kanë ndërmend ta shtypin butonin ” , tha një diplomat evropian.
Tobias Gehrke , një studiues në Këshillin Evropian për Marrëdhëniet me Jashtë , ishte kritik i ashpër, duke thënë se BE-ja humbi mundësinë për t’iu përgjigjur menjëherë letrës së Trump që kërcënonte me tarifa prej 30%, vetëm dy ditë pasi ministrat e tregtisë u takuan.
” Ekziston një ndjesi se Bashkimi ka keqpërdorur një pozicion të mirë negociues” , tha ai. ” Pavarësisht deklaratave të shpeshta për ‘negocimin nga një pozicion force’, nuk ka pasur asnjë veprim për ta konfirmuar këtë. ”
Sipas tij, e vetmja rrugëdalje nga ngërçi është një takim personal midis Trump – i cili është në Skoci këtë fundjavë – me Macron, kancelarin gjerman Friedrich Merz dhe kryeministren italiane Giorgia Meloni.
Skenë e tensionuar para takimit me Kinën
Kërcënimi i tarifave evropiane vjen vetëm disa orë para samitit me Kinën, në të cilin do të marrin pjesë Presidentja e Komisionit Ursula von der Leyen , Presidenti i Këshillit Evropian Antonio Costa dhe Presidenti kinez Xi Jinping.
Kina vazhdon të dominojë marrëdhëniet tregtare me BE-në: suficiti i saj tregtar për gjysmën e parë të vitit 2025 arriti në 143 miliardë euro, 20% më shumë se një vit më parë, falë trefishimit të eksporteve të makinave elektrike hibride nga janari në maj. Makinat hibride nuk i nënshtrohen tarifave ndëshkuese të vendosura nga BE që nga viti 2023. Në të kundërt, importet e makinave elektrike ranë me 32%.
Në të njëjtën kohë, ndalimi i Kinës për eksportin e metaleve të rralla ka shkaktuar probleme për industrinë gjermane të makinave, e cila i ka nevojë ato për mekanizmat në dritare dhe bagazhe .
Top Channel
