Zelensky propozon zgjatjen e ligjit ushtarak 14/07 20:30
Të paktën 27 palestinezë, përfshirë disa fëmijë, u vranë në sulmet izraelite në Rripin e Gazës të dielën, tha Agjencia e Mbrojtjes Civile.
Sipas një zëdhënësi të organizatës së ndihmës së shpejtë në Rripin e Gazës, sulmet, të cilat u zhvilluan para agimit dhe herët në mëngjes, kishin në shënjestër kryesisht shtëpitë dhe kampet për personat e zhvendosur.
Në Qytetin e Gazës, pesë palestinezë, përfshirë gra dhe fëmijë, u vranë në një sulm natën në një shtëpi në kampin Sati, ndërsa dy sulme të tjera në një tjetër shtëpi vranë tre persona, përfshirë një fëmijë, tha zëdhënësi i Agjencisë së Mbrojtjes Civile.
Në kampin e refugjatëve Nusseirat në pjesën qendrore të Rripit të Gazës, 10 persona u vranë në një sulm ndaj një shtëpie, shtoi ai.
Gjashtë palestinezë u vranë këtë mëngjes pranë një pike shpërndarjeje të ujit të pijshëm në Nusseirat. Tre të tjerë u vranë në një bastisje në kampin Al-Maëasi, në pjesën jugore të territorit.
Duke pasur parasysh kufizimet e vendosura ndaj medias nga Izraeli, i cili po rrethon Gazën dhe vështirësitë e aksesit në tokë, Agence France-Presse nuk ishte në gjendje të verifikonte në mënyrë të pavarur rrëfimet dhe pretendimet e palëve të ndryshme.
Top Channel
