Video/ Pamje të rënda, tiktok-erja përplas për vdekje 59-vjeçarin ndërkohë që ishte live në rrjetet sociale 24/12 22:02
Tridhjetë luftëtarë të organizatës kurde PKK dorëzuan armët të premten në një ceremoni simbolike në Kurdistanin irakian, vetëm dy muaj pasi grupi shpalli përfundimin e luftës së armatosur kundër Turqisë.
Ceremonia, që u zhvillua pranë shpellës historike të Casenes në provincën Sulaimaniyah, shënon një kthesë historike në kalimin e PKK-së nga një organizatë e armatosur në një lëvizje politike demokratike.
Para rreth 300 të pranishmëve, luftëtarët, burra dhe gra, vendosën armët e tyre në një gropë, të cilat më pas u dogjën në mënyrë simbolike. Në një deklaratë zyrtare, PKK tha se dorëzimi i armëve bëhet për të garantuar suksesin e procesit të paqes dhe ndërtimit të një shoqërie demokratike. Ankaraja përshëndeti këtë zhvillim si një “pikë pa kthim” në rrugën drejt paqes.
Zyrtarë të lartë turq e cilësuan ceremoninë si një hap konkret dhe të mirëpritur në fazën e tretë të procesit të çarmatosjes. Kjo fazë vjen pas muajsh negociatash të ndërmjetme mes qeverisë turke dhe liderit historik të PKK-së, Abdullah Ocalan, i cili ndodhet në burg që nga viti 1999. Më 12 maj, PKK shpalli zyrtarisht shpërbërjen e saj, duke premtuar se do të vijojë betejën për të drejtat e kurdëve me mjete paqësore dhe demokratike.
Ceremonia u shoqërua me masa sigurie, ndërkohë që një natë më parë, dy dronë u rrëzuan pranë bazave të forcave peshmerga, pa shkaktuar viktima. Të pranishëm në aktivitet ishin përfaqësues të qeverisë së Kurdistanit të Irakut, të agjencive turke të inteligjencës, deputetë të partisë pro-kurde DEM dhe përfaqësues ndërkombëtarë.
Presidenti turk Recep Tayyip Erdogan deklaroi se procesi i paqes do të fitojë vrull pas këtij vendimi të PKK-së për të dorëzuar armët.
Top Channel
