Trump: Izraeli pranon kushtet për armëpushim 60-ditor në Gaza

Dy zyrtarë të administratës thanë se Hamasi ende duhej të binte dakord me marrëveshjen. Në një postim në rrjetin social Truth, Trump tha se Katari dhe Egjiptianët do ta zbatonin atë.

“Përfaqësuesit e mi patën sot një takim të gjatë dhe produktiv me izraelitët për Gazën”, shkroi Trump. “Izraeli ka rënë dakord për kushtet e nevojshme për të finalizuar ARMËPUSHIMIN 60-ditor, kohë gjatë së cilës ne do të punojmë me të gjitha palët për t’i dhënë fund Luftës. Katarianët dhe egjiptianët, të cilët kanë punuar shumë për të ndihmuar në sjelljen e Paqes, do të paraqesin këtë propozim përfundimtar. Shpresoj, për të mirën e Lindjes së Mesme, që Hamasi ta pranojë këtë Marrëveshje, sepse nuk do të përmirësohet – VETEM DO TË PËRKËQENOHET. Faleminderit për vëmendjen tuaj ndaj kësaj çështjeje!”

CNN raportoi më parë se zyrtarët e Katarit i kishin paraqitur të martën si Hamasit ashtu edhe Izraelit një propozim të ri për një armëpushim 60-ditor, i cili mbështetet nga administrata Trump, sipas një burimi të njohur me çështjen.

Propozimi u finalizua pas muajsh përpjekjesh prapa skenave të udhëhequra nga i dërguari special i Presidentit Donald Trump, Steve Witkoff, tha burimi. Ai u paraqit në të njëjtën ditë kur Ministri i Izraelit për Çështjet Strategjike, Ron Dermer, vizitoi Uashingtonin për takime me zyrtarë të lartë të administratës Trump.

Propozimi i ri vjen vetëm disa ditë pasi Katari ndihmoi në ndërmjetësimin e një armëpushimi midis Iranit dhe Izraelit pas sulmeve të SHBA-së dhe Izraelit ndaj programit bërthamor të Iranit, dhe muaj pasi një propozim fillestar për armëpushim të mbështetur nga administrata Trump për Gazën u refuzua nga Hamasi.

Një burim i tha CNN se versioni i ri – mbi të cilin kanë punuar edhe katarianët – është përpjekur të marrë në konsideratë shqetësimet e Hamasit me propozimin e mëparshëm. Gjatë armëpushimit, pengjet izraelite do të liroheshin në këmbim të të burgosurve palestinezë, shtoi burimi.

Shtëpia e Bardhë nuk komentoi mbi detajet e propozimit, të cilat u raportuan përpara postimit të Trump në Truth Social.

Trump është planifikuar të takohet të hënën me kryeministrin izraelit Benjamin Netanyahu, i cili, sipas CNN, po shqyrtonte nëse do të ndiqte një armëpushim apo do të intensifikonte sulmet ndaj Gazës. Të martën, një zyrtar ushtarak izraelit i tha CNN se Izraeli nuk i kishte arritur plotësisht të gjitha qëllimet e tij të luftës, por ndërsa forcat e Hamasit janë tkurrur dhe janë fshehur, është bërë më e vështirë të shënjestrohen në mënyrë efektive ato që kanë mbetur nga grupi militant.

Netanyahu tha të dielën se “janë hapur shumë mundësi ” pas operacioneve ushtarake të Izraelit në Iran, përfshirë mundësinë e kthimit në shtëpi të pengjeve të mbetura të mbajtura në Gaza.

Trump u tha gazetarëve të martën se do të ishte “shumë i vendosur” në diskutimet me Netanyahun në takimin e planifikuar të javës së ardhshme në Shtëpinë e Bardhë dhe parashikoi se kryeministri donte t’i jepte fund luftës.

“Ai dëshiron. Mund t’ju ​​them se ai dëshiron. Mendoj se do të arrijmë një marrëveshje javën tjetër”, tha Trump.

Por edhe me një propozim të ri në tryezë, dakordësia për një armëpushim mbetet një sfidë e madhe. Hamasi ka kohë që ka kërkuar një armëpushim të përhershëm, kështu që është e paqartë nëse do të binte dakord për një armëpushim të përkohshëm 60-ditor. Hamasi gjithashtu ende mban kërkesën e tij kryesore që lufta duhet të përfundojë dhe se do të duhet të qëndrojë në pushtet, gjë që Izraeli nuk do ta lejojë, tha një burim i veçantë i njohur me çështjen.

Megjithatë, ka pasur disa indikacione se Hamasi është i gatshëm të tregojë njëfarë butësie ndaj qëndrimeve të tij të ashpra, tha burimi.

Top Channel