Ishte deklaruar i vdekur nga Izraeli dhe Irani, mediat shtetërore postojnë mesazhin e zyrtarit të lartë iranian: Jam gjallë dhe gati të sakrifikoj veten për fitore 20/06 14:26
Shërbimet iraniane të sigurisë u kanë bërë thirrje qytetarëve që të raportojnë sjellje të dyshimta, përfshirë persona që marrin pako gjatë natës apo lëvizje të pazakonta të furgonëve.
Disa media lokale kanë shkuar më tej, duke përfshirë në listën e të dyshuarve edhe persona të maskuar apo me shami. Ky është një pasqyrim i asaj që ndodhi në fillim të Operacionit “Rising Lion”, kur njësitë e Mossadit – ndoshta të përbëra nga elementë vendas dhe disa të huaj – vepruan prapa fronteve, duke shkatërruar lëshuar armë dhe duke vrarë personalitete të rëndësishme. Në Teheran besojnë se këto njësi janë ende aktive dhe të gatshme për të vepruar. Autoritetet i “shohin” ato kudo.
“Izraelitët”, sipas autoriteteve iraniane, dyshohet se janë punësuar në kompani transporti, për të lëvizur lirshëm me automjete të transformuara në platforma për dronë. Janë publikuar edhe foto të kamionçinave, të ngjashme me atë të përdorur për të eliminuar kreun e programit bërthamor, Mohsen Fakhrizadeh. Në bagazh fshihej një mitraloz i komanduar nga distanca.
Këtë herë, me të njëjtin sistem, besohet se janë përdorur raketa antitank Spike 2. Janë publikuar gjithashtu imazhe të tjera të pozicioneve të zjarrit, ku janë gjetur komponentë të braktisur, si një antenë dhe një trekëmbësh. Ka dyshime se këto pajisje janë përdorur për të qëlluar drejt shtëpive të shkencëtarëve. Burimet, përfshirë edhe ato izraelite në mënyrë anonime, flasin për një mision që ka nisur që në tetor, me mobilizimin e ekipeve të para për të pritur mbërritjen e materialit, pajisje, avionë të vegjël, mjete komunikimi. Më pas, rrjeti është zgjeruar, duke qëndruar në pritje të një urdhri.
Autoritetet njoftuan ekzekutimin e një spiuni të arrestuar në vitin 2023 ( që kishte përdorur një dron), dhe më pas një seri arrestimesh të tjera. Janë kryer bastisje në Kurdistan, ku janë arrestuar bashkëpunëtorë të dyshuar të Mossadit, si dhe persona të kapur duke fotografuar ndërtesa, apo që përhapnin informacione të konsideruara të rrezikshme për sigurinë kombëtare. Aktivitetet janë dokumentuar me imazhe për të theksuar reagimin shtetëror – përfshirë burra të lidhur përtokë. Është ndjekur një kamion me ngarkesë eksplozivësh të fshehur nën dysheme (të paraqitur si pako droge). Janë sekuestruar municione, pajisje radio-komunikimi, por edhe disa llastiqe në një qeli në veriperëndim. Janë gjetur gjithashtu disa dronë dhe një laborator i vogël.
Kjo “gjueti për 007” shërben gjithashtu si pretekst për të shtypur më tej çdo formë opozite dhe për t’i mbyllur gojën atyre që nuk janë në një linjë me vijën patriotike të përcaktuar nga Ali Khamenei. Ky qëndrim mbështetet jo vetëm nga pjesa e popullsisë që qëndron besnike ndaj regjimit, por edhe nga ata që e shohin ruajtjen e sovranitetit si çështje prioritare. Ndër të prekurit nga kjo valë shtypjeje është edhe reperi disident Toomaj Salehi, i cili raportohet se është burgosur.
Alarmet qëndrojnë në përputhje me ngjarjet në terren. Tel Avivi ka deklaruar se ka eliminuar Ali Shadmani, kreun e ri të komandës së emergjencës, në një lokacion që mendohej sekret dhe i sigurt nga ushtria iraniane. Fati i Gjeneral Sayed Mousavit, shefit të ri të shtabit, mbetet i pasigurt – edhe ai i konsideruar si objektiv i mundshëm i një sulmi. Të dy zyrtarët kishin marrë detyrën së fundmi. Ky zhvillim ka ushqyer një ndjenjë “paranoje” që përdoret edhe si instrument në luftën psikologjike.
Reagimi në Izrael
As Izraeli nuk po e nënvlerëson situatën. Agjencia e sigurisë Shin Bet ka arrestuar dy shtetas të dyshuar për bashkëpunim me “Rojet e Revolucionit”, në kuadër të një serie rastesh ku ushtarë janë rekrutuar në këmbim të parave dhe të gatshëm për të kryer eliminime. Ky është një kërcënim që, sipas autoriteteve izraelite, nuk ka qenë kurrë më serioz sesa në dy vitet e fundit. Si rezultat, censura është forcuar për të parandaluar shpërndarjen e imazheve që zbulojnë objektivat.
Lufta dixhitale – Beteja e re
Konflikti është përhapur edhe në sferën dixhitale. Hakerët kanë ndërprerë transmetimet televizive kombëtare. Grupi Predatory Sparrow ka marrë përgjegjësinë për një sulm që bllokoi bankomatet, si dhe hakerimin e një depoje kriptomonedhash të lidhur me Iranin. Ndërkohë, hakerët që simpatizojnë regjimin iranian po përgatiten për aksione të ngjashme kibernetike. Sipas analizave të shumta, ky është vetëm fillimi.
Top Channel
