Kryministri Starmer në Tiranë, 10 Downing Street tregon detajet

Kryeministri Keir Starmer do të nisë sot një vizitë dyditore në Tiranë, për të forcuar bashkëpunimin mbi çështjen e emigracionit dhe për të zgjeruar iniciativat e suksesshme të përbashkëta me Shqipërinë edhe në vende të tjera të rajonit.

Mbretëria e Bashkuar do të intensifikojë përpjekjet për të shkatërruar rrjetet kriminale që ushqejnë emigracionin e paligjshëm në Ballkanin Perëndimor.

Vizita vjen pas prezantimit nga Kryeministri të Dokumentit të Bardhë për Emigracionin, një plan gjithëpërfshirës që synon të ulë ndjeshëm emigracionin neto drejt Mbretërisë së Bashkuar.

Gjatë vizitës së parë zyrtare Keir Starmer do të vizitojë Portin e Durrësit për të parë nga afër si po funksionon bashkëpunimi me Mbretërinë e Bashkuar në ndalimin e trafikantëve të qenieve njerëzore, pengimin e emigrantëve të mundshëm dhe kapjen e kriminelëve që përdorin dokumente false.

Bashkëpunimi me Shqipërinë ka treguar se qasja e kësaj qeverie për të ndalur dhe penguar emigrantët që në fazat e para mund të ulë ndjeshëm emigracionin e paligjshëm drejt brigjeve britanike, theksohet në deklaratë.

Ka pasur një ulje prej 95% të mbërritjeve të shqiptarëve me gomone në tre vitet e fundit, ndërsa numri i shqiptarëve të rikthyer në vend është dyfishuar në dy vitet e fundit – 5,294 shqiptarë janë kthyer në vitin 2024, krahasuar me 2,035 dy vite më parë.

Gjatë qëndrimit në Shqipëri këtë javë, ai pritet të shpallë zgjerimin e Forcës së Përbashkët të Migracionit me Shqipërinë dhe Kosovën për të përfshirë edhe Maqedoninë e Veriut, dhe do të avancojë diskutimet pozitive me Malin e Zi.

Kjo forcë përbashkon ekspertë nga vendet pjesëmarrëse për të hartuar dhe zbatuar operacione që synojnë zbulimin, parandalimin dhe menaxhimin e emigracionit të paligjshëm. Mbretëria e Bashkuar do të ndajë më shumë të dhëna inteligjente me qëllim që forcat vendore të rendit të kapin grupet e trafikantëve dhe do të dërgojë drone të financuara nga Britania për të zbuluar bandat që kalojnë emigrantët përmes korridorit të Ballkanit Perëndimor drejt MB-së.

Britania do të ndihmojë gjithashtu dy vendet për të forcuar kontrollet në pikat kufitare.

Zgjerimi i forcës vjen përpara Samitit të Ballkanit Perëndimor që do të mbahet në Britani në vjeshtë, i cili pritet të fokusohet në sigurinë rajonale, rritjen ekonomike dhe përballimin e sfidave të përbashkëta si ndërhyrjet e huaja dhe emigracioni i paligjshëm me zgjidhje inovative.

Deklarata e Kryeministrit Keir Starmer: Sfida globale kërkojnë zgjidhje të përbashkëta, dhe puna që Britania dhe Shqipëria po bëjnë së bashku po sjell siguri për njerëzit që punojnë në të dy vendet.

Dhe puna jonë e përbashkët për të parandaluar, zbuluar dhe kthyer emigrantët e paligjshëm është provë e mëtejshme se veprimi në burim për të mbrojtur kufijtë tanë është qasja e duhur.

Çdo hap që ndërmarrim për të luftuar emigracionin e paligjshëm jashtë vendit, për të shkatërruar rrjetet kriminale që e mundësojnë dhe për të ndërprerë financimet që i mbështesin, po sjell rrugë më të sigurta në Britani dhe po lehtëson shërbimet publike të financuara nga taksapaguesit.

Britania do të forcojë më tej suksesin me Shqipërinë, duke siguruar që pengesat për emigracionin e paligjshëm nga Tirana drejt Britanisë të mbeten të forta.

Në kuadër të një partneriteti strategjik të zgjeruar me Shqipërinë, Kryeministri Starmer dhe Kryeministri shqiptar Edi Rama pritet të bien dakord për të forcuar masat kundër kontrabandës së njerëzve, për të mbështetur viktimat e trafikimit dhe për të garantuar që shqiptarët e kthyer nuk do të tentojnë një udhëtim të dytë.

Dy vendet gjithashtu do të nisin një projekt të ri kundër financave të paligjshme, duke hetuar rrjetet e pastrimit të parave ndërmjet Shqipërisë dhe MB-së.

Dy pajisje për zbulimin e falsifikimeve do t’i dhurohen Policisë së Shtetit për të zbuluar mospërputhje në dokumente dhe për të verifikuar vërtetësinë e tyre, duke ndihmuar autoritetet shqiptare të kapin persona që përpiqen të hyjnë ilegalisht në MB me pasaporta të vjedhura ose false.

Britania do të ndihmojë gjithashtu Shqipërinë në luftimin e të ashtuquajturit “efekti i derës rrotulluese” – kur një emigrant kthehet në Shqipëri, por më pas shmang autoritetet dhe largohet sërish – përmes një programi të ri për të ndihmuar të rinjtë shqiptarë të riintegrohen në shoqëri dhe të gjejnë punësim. Fokusi i programit do të jetë në veriun e Shqipërisë, nga ku gjurmohen shumica e emigrantëve që mbërrijnë ilegalisht në Britani.

Liderët gjithashtu pritet të rrisin bashkëpunimin kundër krimit të organizuar të rëndë, përfshirë financimin e një programi të ri të provave forenzike, për të ndarë dhe gjurmuar mostrën e ADN-së së kriminelëve shqiptarë për zgjidhjen e krimeve në Britani.

Zbatimi i fundit i këtij programi çoi në arrestimin e më shumë se 55 kriminelëve të rrezikshëm – përfshirë vrasës, përdhunues dhe autorë të vrasjeve nga pakujdesia – falë bashkëpunimit më të ngushtë mes dy vendeve. Projekti ka pasur 1000 përputhje në bazat e të dhënave të MB-së në 18 muajt e fundit, duke rezultuar në 55 arrestime.

Qeveria britanike do të investojë edhe 1 milion £ shtesë këtë vit në këtë partneritet për të modernizuar kapacitetet shqiptare në fushën e forenzikës, biometrisë dhe aftësive digjitale, me qëllim kapjen e mëtejshme të kriminelëve dhe mbrojtjen e rrugëve britanike.

Kjo do t’u mundësojë gjithashtu autoriteteve ligjzbatuese të të dy vendeve të identifikojnë dhe mbledhin prova për disa nga krimet më të rënda të kryera në Shqipëri, Britani dhe më gjerë.

Më vonë gjatë ditës, Kryeministri do të shohë nga afër bashkëpunimin më të thelluar në fushën e mbrojtjes dhe sigurisë mes Britanisë dhe Shqipërisë, gjatë një vizite te trupat e dy vendeve që trajnojnë ushtarë ukrainas nën Operacionin Interflex.

Dita e dytë e vizitës do të përfshijë pjesëmarrjen e Kryeministrit në Samitin e Komunitetit Politik Evropian, ku do të drejtojë një tryezë të rrumbullakët për Mbrojtjen dhe Sigurinë, si dhe do të vazhdojë diskutimet mbi zgjidhje inovative për sfidën e emigracionit të paligjshëm.