Rusia kryen sulmin më të madh ajror ndaj Ukrainës! Shkon në 14 numri i viktimave, mes tyre edhe fëmijë 25/05 15:36
Bota ka humbur personin më të vjetër. Murgesha braziliane Inah Canabarro Lucas ka ndërruar jetë në moshën 116-vjeçare, në qytetin Porto Alegre të Brazilit, ku jetonte në një shtëpi të Motrave Teresiane, komuniteti fetar i cili e shoqëroi gjatë gjithë jetës së saj.
E lindur më 8 qershor 1908 në shtetin Rio Grande do Sul, Motra Inah u bë murgeshë në të 20-at dhe ia atribuoi jetëgjatësinë e saj besimit tek Zoti, duke deklaruar se “Ai është sekreti i jetës”. Ajo ishte bekuar nga Papa Françesku në vitin 2018 dhe njihej për karakterin e saj të qetë, humorin e mirë dhe dashurinë për futbollin.
E apasionuar pas ekipit brazilian Sport Club Internacional, ajo festonte çdo vit ditëlindjen me një tortë në formën e stadiumit të ekipit të saj të zemrës, ndërsa në ditëlindjen e 116-të u shfaq e veshur me shallin e Internacional. Klubi sportiv postoi një mesazh ngushëllimi, duke e përshkruar jetën e saj si të mbushur me mirësi, besim dhe dashuri për sportin, shkruan BBC.
Sipas të afërmve dhe murgeshave që e shoqëruan, Inah nuk kishte vuajtur nga sëmundje serioze dhe ruajti shëndetin e saj deri në fund, pavarësisht vështirësive me shikimin dhe dëgjimin në vitet e fundit. Ajo kishte kryer vetëm një ndërhyrje kirurgjikale në jetën e saj – një operacion katarakti në moshën 106 vjeçare.
Jetesa e saj ishte e rregullt dhe e disiplinuar. “Zgjohej, hante, lutej dhe flinte në të njëjtën kohë çdo ditë”, tha familja e saj për mediat braziliane.
Pas ndarjes nga jeta të Motrës Inah, titulli i personit më të vjetër të gjallë në botë i kalon 115-vjeçares Ethel Caterham nga Surrey, Angli.
Top Channel
