Trump thirrje Rusisë dhe Ukrainës: Nëse i jepni fund luftës, do të bëni biznes me Amerikën 20/04 22:44
SHBA është e gatshme të njohë kontrollin rus mbi rajonin ukrainas të Krimesë.
Lajmin e përcjell media e njohur amerikane Bloomberg, e cila citon burime të pohojnë se Uashingtoni është i hapur ndaj një lëvizjeje të tillë si pjesë e një marrëveshjeje më të gjerë paqeje mes Moskës dhe Kievit.
Sipas të njëjtave burime megjithatë, ende nuk është marrë një vendim përfundimtar mbi këtë çështje. E konsideruar dikur xhevahiri i kurorës së Perandorisë Ruse, Krimeja me rëndësi strategjike në Detin e Zi ka një histori të gjatë, përfshirë qëndresën ndaj nazistëve gjatë Luftës së Dytë Botërore.
Në vitin 1954, lidershipi i Bashkimit Sovjetik i transferoi Krimenë Ukrainës, duke e arsyetuar këtë lëvizje me lidhjet e ngushta mes tyre. Me shpërbërjen e Bashkimit Sovjetik në 1991, Kievi vazhdoi të ushtronte sovranitet mbi territorin si Republika Autonome e Krimesë.
Rusia nuk e kundërshtoi administrimin ukrainas të Krimesë për më shumë se dy dekada, megjithatë kjo gjë ndryshoi marsin e vitit 2014, kur Vladimir Putin vendosi aneksimin e gadishullit.
Kur Rusia nisi pushtimin e Ukrainës, presidenti Volodymyr Zelensky fillimisht u tregua i kujdesshëm në mënyrën se si i shprehte publikisht ambiciet për këtë territor bregdetar.
Por me kalimin e kohës dhe me fitoret gjithnjë e më të mëdha të trupave ukrainase në fushëbetejë, qëndrimi i tij u bë më i qartë: Krimea është sipas tij pjesë e Ukrainës dhe forcat e armatosura do ta rimarrin atë.
Top Channel
