
Kryepeshkop Joani rrëfen në podkastin me kryeministrin Edi Rama momentin kur është pagëzuar gjatë kohës së regjimit komunist.
Gjithçka ka ndodhur në ilegalitet të plotë, në bodrumin e një shtëpie në një fshat të Vlorës ku ishin të pranishëm vetëm tre vetë, mes tyre edhe nuni i kryepeshkopit, një nga personalitetet më të shquar të kulturës shqiptare, gjuhëtari, përkthyesi dhe filozofi Petro Zheji.
Pse morët vendimin të futeshit në rrugën e besimit ortodoks?
Pas leximit të Ungjillit dhe lidhjen me besimin dhe Ungjillin unë u pagëzova në atë kohë.
Këtu?
Këtu në Shqipëri në kohën e persekutimit.
Domethënë në palestër shkonit si i pagëzuar?
Po i pagëzuar. Nuni ishte Petro Zheji. U pagëzova nga një prift hero që vazhdoi edhe shërbesat në atë kohë që dukej e habitshme që jo vetëm ka bërë pagëzime, por edhe mesha.
Ilegale kuptohet…
Po ilegale. Ishte një kishë e nëndheshme.
Ku ishte?
Ishte në Bestrovë të Vlorës, një fshat. Mesha shpesh herë bëhej në shtëpinë e një besimtari në Vlorë.
Vinin njerëz aty?
Shumë pak, një grup i vogël. Ishin nga Tirana, ishin disa motra nga Korça, besimtare shumë të mëdha. Unë u pagëzova në bodrumin e shtëpisë së tij, ku ishim 3 vetë, ai, nuni Peto dhe unë. Djali i tij Ilia rrinte rrotull mos vinte dikush apo për të lajmëruar. Tani është prift në Vlorë djali i tij. Prandaj ishte lidhja me Kishën Ortodokse se aty u pagëzova.
Krypeshkopi Joan tregon rrëfen gjithashtu edhe kontaktin e parë me Ungjillin, libri që siç thotë ai, i riktheu gëzimin.
“Kur kam qenë i vogël dhe në rini më pëlqente leximi. Atëherë nuk e mendoja pse? Njeriu është një qenie e etur, kërkon ujë. Në vitin e katërt të gjimnazit më ra në dorë Ungjilli. Kur e lexova për herë të parë ndodhi diçka thellë brenda meje. Kur isha i vogël kisha shumë gëzim, kur rritesh gëzimi venitet. Ndodhin ndryshime në trup dhe mendje. Kur lexova Ungjillin mu kthye gëzimi dhe falënderova Zotin. Në atë çast jeta ime ndryshoi. Jo vetëm që lexuam Ungjillin, por pata fatin të njihem me njerëz që kishin aksese në libra dhe së bashku me Petro Zhejin që u bë edhe nuni im, pothuajse kishim lexuar gjithë bibliotekën te rruga e Elbasanit dhe në atë bibliotekë kishte libra jashtëzakonisht të vyer. Këtë e kuptuam kur shkuam në Itali dhe Amerikë”.
Top Channel