Prokuroria e Posaçme Antikorrupsion publikoi këtë të mërkurë raportin për vitin 2024, ku theksohet progresi në luftën ndaj korrupsionit. Në raportin e dorëzuar në Kuvend, SPAK thekson se përgjatë 2024-ës vuri nën hetim 33 ish-zyrtarë të lartë.
“Për sa i përket luftës kundër korrupsionit, Prokuroria e Posaçme ka ndjekur një qasje aktive duke hetuar një numër të konsiderueshëm zyrtarësh të lartë. Gjatë vitit 2024, rezultojnë të jenë nën hetim 33-ish-zyrtarë të lartë, nga të cilët 19 janë dërguar në gjykatë”.
Në raportin e dorëzuar në Kuvend, SPAK bën me dije se janë identifikuar 16 organizata kriminale me rrezikshmëri të lartë shoqërore, ku prej tyre janë shkatërruar rreth 10.
“Sipas vlerësimit të brendshëm të SPAK, janë identifikuar rreth 16 grupe kriminale me rrezikshmëri të lartë shoqërore, të cilat janë të mbështetur në lidhje familjare dhe miqësore dhe janë të përfshirë edhe në tregjet ndërkombëtare kriminale, kryesisht në trafikun e kokainës.
Këto grupe janë aktive në qarqet e Tiranës, Durrësit, Shkodrës, Kukësit, Lezhës, Elbasanit dhe Vlorës. SPAK ka arritur të provojë me sukses 10 prej këtyre grupeve kriminale me aktivitete kriminale në disa qytete të vendit si Tiranë (3); Durrës (2); Elbasan (2); Shkodër (1), Lezhë (1) dhe Kukës (1).
Nga veçoritë dalluese të këtyre grupeve kriminale është struktura e tyre hierarkike, ndarja e roleve, përfshirja në anëtarësinë e tyre të përfaqësuesve të gjyqësorit, prokurorisë, policisë së shtetit, medias dhe botës akademike. Disa tipare të tjera të veçorive të këtyre grupeve janë përdorimi i komunikimeve të koduara si SKY ECC dhe pastrimi i parave nëpërmjet kriptovalutave”, thuhet mes të tjerash.
Arritje, thuhet në raportin e SPAK, kishte gjatë vitit 2024 edhe në luftën ndaj krimit të organizuar.
“Lufta kundër krimit të organizuar edhe për këtë vit, krahasuar me vitin paraardhës, ka shënuar arritje të rëndësishme prej rreth 18,8% të regjistrimeve të këtyre procedimeve penale. Po kështu, është rritur edhe numri i personave të cilët janë nën hetim për këto procedime me rreth 21,6%, krahasuar me vitin 2023. Nga ana tjetër, ka një rënie me rreth 7,3% të çështjeve të dërguara për gjykim për shkak të volumit dhe kompleksitetit të tyre”.
Në raport, Prokuroria e Posaçme Antikorrupsion rendit edhe disa problematika që duhen adresuar, ku shqetësim kryesor thuhet se është presioni nga krimi dhe politika.
“Presioni i jashtëm nga krimi i organizuar, aktorë politikë dhe mediatik, i cili cenon pavarësinë e tij kushtetuese dhe efektivitetin në hetime. Ndërhyrjet e jashtme rrezikojnë gjithashtu, integritetin e prokurorëve dhe të procesit hetimor. Për të garantuar pavarësinë e SPAK-ut, si dhe mbështetje për prokurorët në çështje të ndjeshme, nevojitet një reagim më i koordinuar dhe në kohë i të gjitha institucioneve, të cilat kanë përgjegjësinë e mbrojtjes së integritetit të SPAK”.
Ndër prioritetet për vitin 2025, thekson SPAK, mbetet përfundimi i sistemit të administrimit të çështjeve (Case Management System), i cili është pezulluar pas përfundimit të projektit mbështetës të ICITAP dhe pritet të finalizohet me fonde të BE-së, si dhe ngritja e njësisë së analizës së SPAK, e cila do të mbështesë hetimet komplekse dhe raportimet ndërkombëtare.
Po ashtu është publikuar dhe lista e pasurive të konfiskuara:
17 pasuri të paluajtshme
2. Vlera monetare të konfiskuara në Lekë, Euro dhe Dollar.
395.000 Lekë
38.000 Euro
3. Pasuri te luajtshme të konfiskuara
• 2 pasuri të luajtshme
4. Subjekte tregtare të konfiskuara
7 subjekte tregtare, nga të cilët 6 subjekte tregtare të sekuestruara plotësisht dhe ku përkatëse të personave të pandehur për 1 subjekt tregtar.
Pasuritë e konfiskuara sipas Kodit Penal të Republikës së Shqipërisë vlerësohen rreth 27,202 Euro dhe 510.825.564 Lekë.
Top Channel
