Trumpit ‘nuk i del e keqja’ me Kinën, jep urdhër për administratën: Askush të mos ketë asnjë marrëdhënie romantike apo seksuale me kinezët 03/04 20:21
Kremlini thotë se po shqyrton seriozisht propozimet e SHBA-së për t’i dhënë fund luftës në Ukrainë, por “nuk mund të pranojë” marrëveshjen aktuale të paqes të presidentit amerikan, Donald Trump dhe ka paraqitur një grup të ri kërkesash.
Moska dëshiron që Shtetet e Bashkuara të marrin parasysh ato që i shohin si shkaqet kryesore të konfliktit, tha sot një diplomat rus, sipas medias shtetërore, cituar nga një raport në Daily Mail.
“Ne i marrim shumë seriozisht modelet dhe zgjidhjet e propozuara nga amerikanët, por nuk mund t’i pranojmë të gjitha në formën e tyre aktuale”, tha zëvendësministri i Jashtëm Sergei Ryabkov.
“Me sa shohim sot tek ata nuk ka vend për kërkesën tonë kryesore, që është zgjidhja e problemeve që lidhen me shkaqet rrënjësore të këtij konflikti”, tha ai në një intervistë për revistën “International Affairs”.
“Kjo mungon plotësisht dhe kjo duhet kapërcyer”, tha ai.
Trump të premten e kaluar shprehu zhgënjimin me luftimet e vazhdueshme në një luftë që ai kishte premtuar se do të përfundonte shpejt. Ndërsa këmbënguli se po bëhej përparim në negociata, ai tha se do të konsideronte vendosjen e sanksioneve të mëtejshme për të ushtruar presion ndaj Moskës.
Ai gjithashtu akuzoi Zelenskyn se po përpiqej të tërhiqej nga një marrëveshje me SHBA-në për aksesin në burimet minerale të Ukrainës.
Ukraina ka mbajtur një raund të parë konsultimesh me Shtetet e Bashkuara mbi atë që tha se ishte versioni më i fundit i marrëveshjes për mineralet, sipas Ministrit të Jashtëm ukrainas, Andrii Sybiha.
Putin ka refuzuar propozimin e SHBA për një ndërprerje të menjëhershme dhe të plotë 30-ditore të luftimeve, pavarësisht nga presioni që ka ushtruar Trump.
Rusia po këmbëngul në një marrëveshje të Detit të Zi në mënyrë që të “vonojë përpjekjet për një armëpushim të përgjithshëm dhe të nxjerrë lëshime shtesë nga Perëndimi”, sipas një vlerësimi nga Instituti për Studimin e Luftës, një institut me bazë në Uashington.
Putin ka përjashtuar më parë një ndërprerje të përkohshme të armiqësive, duke thënë se nga kjo do të përfitonte vetëm Ukraina dhe aleatët e saj perëndimorë duke i lejuar ata të rimbushin arsenalin e tyre.
Ai ka këmbëngulur se Moska dëshiron një marrëveshje gjithëpërfshirëse që do të sigurojë një zgjidhje të qëndrueshme.
Trump ka lënë të kuptohet se ai mund të konsiderojë sanksione të reja të naftës ndaj Rusisë.
Megjithatë, zëdhënësi i Kremlinit Dmitry Peskov tha të martën se nuk ka përparim të rëndësishëm në negociata.
“Çështjet që po diskutojmë në lidhje me zgjidhjen e Ukrainës janë mjaft komplekse dhe kërkojnë shumë përpjekje shtesë”, u tha Peskov gazetarëve.
Top Channel
