“Jam shpallur non grata”/ Kandidati për deputet e zbulon për herë të parë në Top Story: Shkak ka qenë dokumentari i vrasjes së shqiptarëve 23/04 22:46
Kreu i Kishës Katolike, Papa Françesku, përmes një letre ka uruar Kryepeshkopin e ri të Kishës Ortodokse Autoqefale Shqiptare.
Në mesazhin e tij, Papa Françesku shpreh shpresat e tij për angazhimin e rinovuar për thellimin e marrëdhënieve midis Kishës Katolike dhe Kishës Ortodokse Autoqefale të Shqipërisë.
Selia e Shenjtë dërgoi një delegacion në kurorëzimin e Fortlumturisë së tij Joan si Kryepeshkop i Tiranës, Durrësit dhe i Gjithë Shqipërisë, që u zhvillua të shtunën në Tiranë.
Kryepeshkopi Flavio Pace, Sekretar i Dikasterit për Nxitjen e Unitetit të Krishterë kryesonte delegacionin, i shoqëruar nga Ms. Andrea Palmieri, Nënsekretar i të njëjtit Dikaster, dhe Ms. Ionuţ Paul Strejac, i Ngarkuar me Punë ad interim i Nunciaturës Apostolike në Tiranë.
Papa Françesku i dërgoi një letër Kryepeshkopit Joan për të shprehur “përshëndetjet e tij vëllazërore në dashurinë e Krishtit”.
“Duke shprehur afërsinë time shpirtërore. Ju siguroj për lutjet e mia që Perëndia Atë, burimi i çdo të mire, do t’ju japë dhuratat e bollshme të Frymës së Shenjtë, ndërsa ju drejtoni ata që ju janë besuar në kujdesin tuaj.”
Ai kujtoi paraardhësin e Kryepeshkopit Joan, Fortlumturinë e Tij Anastas, zelli apostolik i të cilit “la një trashëgimi të thellë dhe të qëndrueshme në Shqipëri”.
“Anastas u dallua me përkushtimin e tij për bashkëjetesën paqësore të burrave dhe grave që u përkasin kishave dhe traditave të ndryshme fetare dhe ai kontribuoi ndjeshëm në përmirësimin e marrëdhënieve midis kishave tona”, tha Papa.
Papa Françesku vazhdoi duke ftuar Kryepeshkopin Joan që të vazhdojë të nxisë dialogun si një mënyrë për të kapërcyer ndarjet dhe për të kërkuar bashkim të plotë midis të krishterëve.
“Në këto kohë të vështira të shënuara nga lufta dhe dhuna është gjithnjë e më urgjente që të krishterët të japin dëshmi të besueshme për unitetin, në mënyrë që bota të mund të përqafojë plotësisht mesazhin e ungjillit të solidaritetit vëllazëror dhe paqes”, tha ai.
Papa vuri në dukje se të krishterët mbajnë përgjegjësi për t’i treguar botës “bashkimin e vërtetë, mjerisht jo ende i plotë, që tashmë na bashkon”.
“Shpresa ime e përzemërt që nën drejtimin tuaj atëror, marrëdhëniet midis Kishës së Shqipërisë dhe Kishës Katolike do të zhvillohen më tej, duke kërkuar forma të reja bashkëpunimi të frytshëm në shpalljen e Ungjillit, në shërbim të atyre që kanë më shumë nevojë dhe duke ripërtërirë angazhimin tonë për zgjidhjen e çështjeve që ende na ndajnë përmes dialogut të bamirësisë dhe së vërtetës”, përfundoi Papa.
Në përfundim, Papa Françesku e siguroi Kryepeshkopin Joan për lutjet e tij për shërbesën e tij dhe i dha atij “një përqafim vëllazëror në Krishtin Zotin tonë”.
Top Channel
