Një numër kaq i lartë i personave pas hekurave do të thotë shumë para nga taksat tona për ti mbajtur edhe në burg.
Sipas drejtorisë së përgjithshme të burgjeve për vitin 2024 u shpenzuan 7.9 miliardë lekë. Një ditë qëndrimi në burg kushtoi 4 mijë e 149 lekë për person. Pra në një muaj një i burgosur kushtoi 125 mijë lekë të reja ose 1244 euro.
Kjo shifër është disa herë më e lartë se ndihma ekonomike që marri familjet në nevojë në vendin tonë, që fillon nga 8 mijë lekë në muaj.
“Ne harxhojmë jo pak para për të gjithë këta persona që janë ë burgje, një i burgosur harxhon sa 10 familje në nevojë. Familjet në nevojë që s’kanë bërë asgjë marrin një të dhjetën e asaj që del nga buxheti i shtetit për një të burgosur”, u shpreh Erinda Ballanca, Avokati i Popullit.
Nëse marrim në konsideratë përgjigjen e drejtorisë së përgjithshme të burgjeve që koha mesatare e qëndrimit në paraburgim është 18 muaj, atëherë një i paraburgosur kushton 2.2 mln lekë, një kosto që mund të eliminohej nëse aplikohen masa të tjera për vepra të lehta.
“Duhen ndryshime në kodin e procedurës penale për të përcaktuar që për vepra penale konkrete që nuk kalojnë një masë dënimi 7-10 vite në maksimum të mos caktohet masa e sigurimit arrest me burg, pra të vendoset një kufi maksimal apo minimal të kësaj mase”, u shpreh Lirime Canaj, pedagoge.
“Fakti që ne kemi një numër të jashtëzakonshme të personave të dënuar apo arrestuar për të cilët shoqëria jonë shpenzon një numër të konsiderueshëm parash për ti mbajtur, mendoj që është e kotë”, u shpreh avokati Anton Kosteri.
Për një drejtësi efikase është më e rëndësishme zbulimi i veprave penale të rënda, se sa aplikimi i dënimeve të rënda për vepra të vogla. Në këtë kuptim ekspertët aludojnë se shpeshherë arrestimet bëhen për të mbushur statistikat.
“Prokurorët, gjyqtarët por më së shumti punonjësit e policisë qëllimin primar të tyre kanë realizimin e statistikave duke harruar misionin e tyre cilësor. A ka më rëndësi arrestimi i 100 persona për drejtimin e automjeteve jo në gjendje të rregullt apo zbulimi i një vepre vrasja që fatkeqësisht kemi shumë pa autor”, u shpreh avokati, Anton Kosteri.
Top Channel
