![](https://top-channel.tv/wp-content/uploads/2024/09/0-2024-09-07T190138.257-800x450.jpg)
Revista gjermane “Travel Book”, i ka kushtuar një artikull Shqipërisë me gjithçka qe vendi ynë ofron.
Nga Alpet, deti, lumenjtë e egër e deri te rrënojat e lashta dhe qytetet e gjalla, revista rendit atraksionet në Shqipëri.
Ka shumë thesare natyrore të egra, pothuajse të pazbuluara, peizazhe shkëmbore në gjelbërim të harlisur, vende të Trashëgimisë Botërore të UNESCO-s, liqene të pastër e male të larta. Ekziston edhe një brez i gjatë bregdetar përgjatë Adriatikut me plazhe mahnitëse e ku pushuesit mund të gjejnë ende lehtësisht një vend për të vendosur peshqirin e tyre.
Dhe e fundit, por jo më pak e rëndësishme, qytete emocionuese si “Qyteti i Gurtë”, Gjirokastra, “Qyteti i një mbi një dritareve”, Berati dhe sigurisht Tirana, kryeqyteti i gjallë i Shqipërisë me arkitekturën e tij në ngjyrë pastel, shkruan më tej, “Travel Book”.
Turistët që adhurojnë historinë mund të vizitojnë ndër të tjera, mbetjet nga lashtësia, si dhe periudha e Perandorisë Osmane e diktaturës komuniste. Adhuruesit e sporteve në natyrë mund të zgjedhin midis një sërë aktivitetesh si ecja, ngjitja, çiklizmi në mal, skijimi e rafting në ujë.
Pushuesit e huaj mund të eksplorojnë plazhet e ëndrrave në Rivierën Shqiptare. Përveç kryeqytetit, Tiranës, Shqipëria ofron destinacione të shumta udhëtimi që mund të jenë interesante për vizitorët.
Vendet e Trashëgimisë Botërore të UNESCO-s të Beratit dhe Gjirokastrës janë të njohura, ndër të tjera. Qytete si Saranda, Durrësi dhe Vlora janë gjithashtu të njohura për turistët. Janë të panumërta pamjet për t’u zbuluar në shumë qytete dhe qyteza të vogla emocionuese në Shqipëri.
Ju mund të vizitoni sheshin e famshëm Skënderbej në kryeqytet, kalatë e Beratit dhe të Gjirokastrës e rrënojat në Butrint dhe Shkodër. Përveç qyteteve që ia vlen të vizitohen ka edhe aktivitete të shumta që vizitorët në Shqipëri mund të bëjnë.
Ju mund të bëni një shëtitje në kryeqytetin, Tiranë, një shëtitje me makinë mbi Qafën e njohur të Llogorasë e të ecni në Alpet Shqiptare.
Top Channel