Analiza: Erdogan synon rritjen e tregtisë me Rusinë 24/11 16:25
Tetë ushtarë izraelitë u vranë në jug të Rripit të Gazës të shtunën, njoftuan autoritetet izraelite, ndërsa forcat ushtarake vazhduan ofensivën brenda dhe rreth qytetit jugor Rafah dhe sulmet ajrore goditën disa zona të Gazës, duke vrarë të paktën 19 palestinezë.
Banorët në periferi të qytetit të Gazës thanë se sulmet ajrore izraelite goditën dy shtëpi duke vrarë të paktën 15 vetë. Katër të tjerë u vranë në sulme të veçanta në jug, thanë autoritetet shëndetësore që kontrollohen nga Hamasi.
Ushtria izraelite tha se forcat e saj në qytetin Rafah, afër kufirit me Egjiptin, kishin kapur sasi të mëdha armësh, një pjesë të fshehura në rrjetin e gjerë të tuneleve të ndërtuara nga Hamasi. Luftimet vazhdojnë në një kohë që përpjekjet për të arritur përparim drejt një armëpushimi dështuan.
Dëshmitarët në Rafah, në kufirin jugor të Gazës me Egjiptin, njoftuan për sulme me helikopterë, ndërsa krahu i armatosur i Hamasit tha se militantët e tij qëlluan me mortaja ndaj trupave izraelite pranë lagjes Tal al-Sultan. Lufta filloi pas sulmit të Hamasit më 7 tetor në jug të Izraelit që shkaktoi 1,194 të vdekur, kryesisht civilë, sipas agjencisë franceze të lajmeve AFP, bazuar në shifrat zyrtare izraelite. Militantët morën gjithashtu 251 pengje.
Prej tyre, 116 mbeten në Gazë, megjithëse ushtria thotë se 41 janë të vdekur. Ofensiva hakmarrëse e Izraelit ka vrarë të paktën 37,266 njerëz në Gazë, kryesisht civilë, sipas ministrisë së Shëndetësisë që kontrollohet nga Hamasi.
Top Channel
