Britania e Madhe ‘pushtohet’ nga mjegulla, aeroportet anulojnë dhjetëra fluturime 27/12 23:00
Izraeli dhe Egjipti janë bllokuar në një mosdakordësi rreth pikës kufitare Rafah, duke fajësuar njëri-tjetrin për mbylljen e vazhdueshme të tij, ndërkohë kriza humanitare e Gazës përkeqësohet.
Forcat izraelite kanë marrë nën kontroll anën e kalimit në Gaza. Të martën, Ministri i Jashtëm i Izraelit, Israel Katz, tha se ai i kishte kërkuar Mbretërisë së Bashkuar dhe Gjermanisë për “nevojën për të bindur Egjiptin që të rihapte” kalimin. Por Egjipti thotë se janë operacionet ushtarake të Izraelit në zonë që po pengojnë kalimin e ndihmave.
Kajro tha se Izraeli po përpiqej të zhvendoste fajin për ndihmën e bllokuar. Katz shtoi më tej se Hamas nuk mund të kontrollojë më kalimin e Rafahut, duke përmendur shqetësimet e sigurisë mbi të cilat Izraeli “nuk do të bëjë kompromis”.
Ministri i Jashtëm i Egjiptit, Sameh Shoukry, iu përgjigj shpejt komenteve me një deklaratë që thoshte se Izraeli ishte përgjegjës për krizën humanitare në Gaza dhe se veprimet e ushtrisë izraelite në zonën e Rafahut po bllokonin ndihmën. BBC shkruan se pothuajse 450,000 palestinezë janë larguar nga Rafah gjatë javës së kaluar pasi ushtria izraelite u zhvendos në zonë. Tanket izraelite thuhet se po futen më thellë në qytetin Rafah, i cili është në veri të pikës kufitare.
António Guterres, Sekretari i Përgjithshëm i OKB-së, tha në një deklaratë se ai ishte “i tmerruar nga përshkallëzimi i aktivitetit ushtarak në dhe rreth Rafah nga Forcat e Mbrojtjes izraelite”.
“Këto zhvillime po pengojnë më tej aksesin humanitar dhe po përkeqësojnë një situatë tashmë të rëndë. Në të njëjtën kohë, Hamasi vazhdon të gjuajë raketa pa dallim. Civilët duhet të respektohen dhe mbrohen në çdo kohë, në Rafah dhe gjetkë në Gaza. Për njerëzit në Gaza, askund nuk është i sigurt tani”, tha ai.
Top Channel
