Marrëveshja për transportin ndërkombëtar, Balluku në Kuvend: Rritja dhe forcimi i sektorit të turizmit, objektiv strategjik i qeverisë

Balluku tha se me anë të kësaj marrëveshje, qeveria ka si objektiv strategjik rritjen dhe forcimin e sektorit të turizmit.

“Vendi ynë ka aderuar në marrëveshjen interbus në vitin 2004 për herë të parë dhe në bazë të kësaj marrëveshje kryen transporte ndërkombëtare të rastit apo turistike. Qëllimi i marrëveshjes është që të zgjerohet mbi procedurat për shërbimet e rregullta dhe të specializuara që janë objekte autorizimi. Protokolli synon të ndikojë në promovimin dhe zhvillimin e mëtejshëm të transportit ndërkombëtar të udhëtarëve në Europë. Ka objektiv strategjik të qeverisë për të rritur dhe forcuar sektorin e turizmit dhe dëshirën për të promovuar shkëmbimin kulturor ndërmjet palëve kontraktuese të këtij prokotolli”– tha Balluku.

Mes të tjerash, ajo renditi disa prej projekteve kryesore infrastrukturore të cilat do të ndikojnë në përballimin e shtimit të fluksit të vizitorëve në vendin tonë gjatë këtij sezoni turistik.

“Ka shumë projekte infrastukturore që dorëzohen këtë vit, askush nuk mund të vërë në dyshim përpjekjen, angazhimin dhe fokusin e qeverisë shqiptare për të çuari nfrastrukturën në një nivel tjetër që do i përgjigjet shumë mirë vizitorëve të huaj. Iu ftoj ta votojmë sot këtë projektligj, faleminderit për vëmendjen”- shtoi zv.kryeministrja.

Fjala e plotë në Kuvend

E nderuar Kryetare,

Të nderuar kolegë,

Projektvendimi i cili po shqyrtojmë sot parashikon aderimin e Republikës së Shqipërisë në Protokollin e Marrëveshjes mbi transportin ndërkombëtar të rastit të udhëtarëve me autobus, ndryshe e quajtur marrëveshja Interbus, në lidhje me transportin ndërkombëtar të rregullt dhe të specializuar të udhëtarëve me këtë mjet udhëtues.

Vendi ynë ka aderuar në Marrëveshjen Interbus në vitin 2004 për herë të parë dhe në bazë të kësaj marrëveshje kryhen transportet ndërkombëtare të rastit apo ato turistike dhe në ndërkohë, nëpërmjet përdorimit të librave të udhëtimit, i cili lëshohet për subjektet e licencuara për transport ndërkombëtar të udhëtarëve, ky proces formalizohet.

Qëllimi i Marrëveshjes Interbus është që të zgjerohet përmes dispozitave të këtij Protokolli shtesë, mbi procedurat për shërbimet e rregullta dhe të specializuara, që janë objekt autorizimi. Protokolli synon të ndikojë në promovimin dhe zhvillimin e  mëtejshëm të transportit ndërkombëtar të udhëtarëve në Europë, si dhe për të lehtësuar organizimin dhe operimin e tij. Ka si objektiv strategjik të Qeverisë për të rritur dhe forcuar sektorin e turizmit dhe dëshirën për të promovuar më tej shkëmbimin kulturor ndërmjet Palëve Kontraktuese të këtij Protokolli, si dhe dëshirën për të zgjeruar qëllimin e shërbimeve të transportit të përcaktuar në Marrëveshjen Interbus, për të mbuluar gjithashtu shërbimet e rregullta dhe të specializuara që janë objekt i disa kushteve si më poshtë

• Transportin ndërkombëtar rrugor të udhëtarëve të çdo kombësie, me anë të mjeteve dhe të shërbimeve të rregullta dhe të rregullta të specializuara me autobus:
• Udhëtimet bosh të këtyre autobusëve që merren me këto lloj shërbimesh.

Protokolli gjithashtu përcakton se Palës Kontraktuese duhet ti garantojnë zbatimin e parimeve të mosdiskriminimit për shkak të kombësisë, vendit ku është vendosur operatori i transportit, vendit të origjinës, si dhe vendit të destinacionit të autobusit dhe shërbimit të ofruar.

Ky Protokoll ka qenë i hapur për nënshkrim nga Palët Kontraktuese të Marrëveshjes Interbus, pranë Sekretariatit të Përgjithshëm të Këshillit të Bashkimit Evropian, që vepron si Depozitues i këtij Protokolli dhe është nënshkruar nga Bashkimi Evropian, Mbretëria e Bashkuar, Principata e Andorrës, Bosnje-Hercegovina, Republika e Moldavisë, Republika e Maqedonisë së Veriut dhe Ukraina.

Në një kohë kur turizmi në Republikën e Shqipërisë ka shënuar një hov të ri, ndërkohë që pas një prove gjenerale të suksesshme të vitit 2023 kur në territorin tonë hyjnë 10 milionë pasagjerë, sot kur jemi të përgatitur sipas të gjitha projeksioneve për të pranuar dhe për të akomoduar në vendin tonë mbi 14 milionë pasagjerë, të gjitha planet të cilat kanë të bëjnë me transportin detar, atë ajror dhe rrugor janë të domosdoshme dhe prioritare. Çdo marrëveshje e cila akomodon një përafrim ligjor me të gjitha kriteret dhe kërkesat e Bashkimit Europian në këtë moment janë shumë të rëndësishme.

Ndaj unë do të theksoja që përpjekjeve të Qeverisë për të ngritur një infrastrukturë moderne, me ndërtimin e Korridoreve rrugore, ashtu siç është ndërtimi i Korridorit VIII dhe ndërtimi i Korridorit Blu, një prej segmenteve të të cilit do të dorëzohet në 30 qershor të këtij viti, segmenti i parë, ai që lidhë Thumanë-Kashar, por duke pasur parasysh dhe një nyje shumë të rëndësishme që është nyja e lidhjes me aeroportit ndërkombëtar, si dhe duke pasur të gjitha planet e tjera për këtë verë për të hapur tunelin e Llogarasë gjithashtu në 30 qershor apo në ditët e para të korrikut, për të vazhduar më pas me dorëzimin e Unazës së Madhe të Tiranës, në fund të dhjetorit të këtij viti apo edhe dorëzimin e punimeve në aeroportin ndërkombëtar të Vlorës, gjithashtu në dhjetor të 2024, sigurisht askush nuk mund të vendosë në dyshim të gjithë përpjekjen, angazhimin dhe fokusin e Qeverisë Shqiptare për të çuar infrastrukturën kritike, infrastrukturën e transportit detar, tokësor dhe ajror në një nivel tjetër që do ti përgjigjej fare mirë kërkesës së rritur të vizitorëve të huaj, por edhe të investitorëve të huaj në Republikën e Shqipërisë.

Ju ftoj që ta votojmë sot këtë projektligj.

Faleminderit për vëmendjen.

Top Channel