Prokuroria e Posaçme kundër Korrupsionit dhe Krimit të Organizuar ka përfunduar hetimet paraprake dhe e ka dërguar për gjykim çështjen për disa zyrtarë të Bashkisë së Tropojës, të kallëzuar penalisht nga Kontrolli i Lartë i Shtetit, në vitin 2021, për shkelje të barazisë në tendera.
Tre zyrtarët e komisionit të vlerësimit të ofertave Zenel Çela, Ramiz Bardhi dhe Rexhep Ismajlisufaj, janë hetuar në gjendje të lirë për shkeljen e barazisë së pjesëmarrësve tendera dhe ankande publike në lidhje me procedurën e ndjekur në përzgjedhjen e kompanisë që do të ndërtonte palestër e terrene sportive në gjimnazin “Asim Vokshi” në Tropojë me një vlerë 50 milionë lekë.
Nga provat që SPAK ka grumbulluar, rezulton e provuar, se tre të pandehurit, anëtarë të Komisionit të Vlersimit të Ofertave, nuk kanë trajtuar në mënyrë të barabartë operatorët ekonomikë që merrnin pjesë në garë.
Megjithëse Bashkimi i Operatorëve Ekonomikë “Halili 1 & Shendelli”, ka paraqitur ofertën më të ulët në vlerën 42 milion lekë, pa Tvsh, tre anëtarët e komisionit të vlerësimit të ofertave në kundërshtim me Ligjin dhe Rregullat e prokurimit publik, kanë shpallur fitues operatorin ekonomik “4 A-M”, me ofertën 50 milionë lekë pa Tvsh, duke shkaktuar 8 milion lekë dëm ekonomik shtetit.
Prokuroria e Posaçme kundër Korrupsionit dhe Krimit të Organizuar Tiranë, ka përfunduar hetimet paraprake dhe ka paraqitur para Gjykatës së Posaçme të Shkallës së Parë për Korrupsionin dhe Krimin e Organizuar, kërkesën me marrëveshje për pranimin e fajësisë, të procedimit penal Nr. 288, të vitit 2021, në ngarkim të të pandehurve:
Zenel Çela, akuzuar për kryerjen e veprës penale “Shkelja e barazizë së pjesëmarrësve në tendera apo ankande publike”, parashikuar nga neni 258, i Kodit Penal (hetuar në gjendje të lirë);
Ramiz Bardhi, akuzuar për kryerjen e veprës penale “Shkelja e barazizë së pjesëmarrësve në tendera apo ankande publike”, parashikuar nga neni 258, i Kodit Penal (hetuar në gjendje të lirë);
Rexhep Ismajlisufaj, akuzuar për kryerjen e veprës penale “Shkelja e barazizë së pjesëmarrësve në tendera apo ankande publike”, parashikuar nga neni 258, i Kodit Penal (hetuar në gjendje të lirë);
Procedimi penal Nr. 288, i vitit 2021, është regjistruar mbi bazën e materialit kallëzues të referuar nga Kontrolli i Lartë i Shtetit. Objekt i hetimit të këtij procedimi penal ka qenë procedura e ndjekur nga autoriteti kontraktor Bashkia Tropojë, në prokurimin publik me objekt “Shkolla Asim Vokshi-Palestër dhe terrene sportive dhe sistemime të jashtme në gjimnazin Asim Vokshi”, me fond limit 50.319.591 lekë, pa Tvsh, lloji i procedurës e hapur.
Nga analiza e provave dhe të dhënave të grumbulluara në funksion të hetimit të këtij procedimi penal, rezulton e provuar, se të pandehurit me veprimet e tyre si anëtarë të Komisionit të Vlersimit të Ofertave, gjatë vlerësimit të ofertave, nuk kanë trajtuar në mënyrë të barabartë operatorët ekonomikë pjesëmarrës në procedurën e prokurimit me objekt “Shkolla Asim Vokshi”, Bashkia Tropojë.
Megjithëse Bashkimi i Operatorëve Ekonomikë “Halili 1 & Shendelli”, ka paraqitur ofertën më të ulët në vlerën 42.072.833 lekë, pa Tvsh, të pandehurit në cilësinë e anëtarëve të Komisionit të Vlerësimit të Ofertave, në kundërshtim me Ligjin dhe Rregullat e prokurimit publik, si dhe me kriterin e vendosur në Dokumentat Standarte të Tenderit, kanë shpallur fitues operatorin ekonomik “4 A-M”, me ofertën 50.269.533 lekë pa Tvsh, duke shkaktuar një dëm ekonomik në vlerën 8.196.700 lekë (si diferencë midis dy ofertave).
Top Channel
