Tragjedia me 133 të vdekur në Moskë, Putin: U arrestuan katër autorët e dyshuar të sulmit

Të paktën 133 njerëz u vranë dhe më shumë se 140 u plagosën kur sulmuesit hynë në ndërtesë, duke qëlluar dhe djegur vendin, sipas BBC.

Autoritetet thanë se 11 persona u arrestuan gjithsej dhe katër personat e armatosur u kapën teksa po shkonin për në Ukrainë.

Grupi Shteti Islamik (IS) thotë se qëndron pas sulmit.

Të shtunën Amaq, kanali i IS në Telegram, postoi një imazh të katër burrave të maskuar të cilët pretenduan se ishin të përfshirë në sulm. Nga ana tjetër, Rusia nuk e ka komentuar pretendimin e IS.

Grupi më vonë publikoi pamje shumë grafike nga sulmi. Videoja, e cila është verifikuar nga BBC si e vërtetë, tregon një nga personat e armatosur duke hapur zjarr ndaj disa personave.

Në një fjalim televiziv, Putin dënoi masakrën më vdekjeprurëse në Rusi për gati 20 vjet si një “akt barbar terrorist” dhe përsëriti sugjerimet e mëparshme nga shërbimet ruse të sigurisë se sulmuesit ishin përpjekur të arratiseshin në Ukrainë.

Kievi hodhi poshtë pretendimin se ishte përfshirë në një farë mënyre në sulm si “absurd”.

“Të sugjerosh se të dyshuarit po shkonin në Ukrainë, do të sugjeronte se ata ishin budallenj ose vetëvrasës”, tha Andriy Yusov, një zëdhënës i drejtorisë së inteligjencës ushtarake të Ukrainës, për BBC.

Presidenti ukrainas Volodymyr Zelensky akuzoi Putinin se kërkon të “fajësojë” Ukrainën për sulmin. “Ky Putin i pavlerë, në vend që të merrej me qytetarët e tij të Rusisë, duke iu drejtuar atyre, heshti për një ditë duke menduar se si ta sillte këtë në Ukrainë”, tha ai në fjalimin e tij të natës.

Këshilli i Sigurisë Kombëtare i SHBA-së tha se e paralajmëroi Rusinë për një sulm të mundshëm ndaj “mbledhjeve të mëdha”, përfshirë koncerte, në Moskë në fillim të këtij muaji. Kremlini në atë kohë e hodhi poshtë atë si “propagandë” dhe një përpjekje të Uashingtonit për të ndërhyrë në zgjedhjet e fundit ruse.

Top Channel