Rama flet pas mbledhjes së Asamblesë, zbardh diskutimet: Anëtarësime të reja dhe barazimin e kuotave gjinore në zonat rurale

“Jemi me anëtarësimet besoj shumë më mirë se çfarë disa nga kolegët mendonin dhe shpreheshin tani jemi në fazën e dytë, siç e vendosem në Asamblenë Kombëtare që është faza e angazhimit për anëtarësimet e reja dhe për adresimin e balancës gjinore në disa zona, në disa organizata në çdo qark që ka probleme me balancat gjinore”-tha Rama.

-Kush janë qarqet problematike zoti Rama?

Rama: Nuk mund të them qarqe problematike, por pika të caktuara që janë kryesisht në zona rurale ku duhet bërë pak më shumë punë për të garantuar një pjesëmarrje më të balancuar mes burrave dhe grave dhe djemve e vajzave

-A do të shërbejnë këto raportime që po bëjnë drejtuesit e qarqeve për të çuar më pas edhe në ndryshimet e tyre në bazë të përformancës. A do të ketë ndryshime?

Rama: Ndryshimet janë pjesë e jetës së Partisë Socialiste, dhe prandaj Partia Socialiste është parti fituese, sepse nuk pret ta ndryshojnë të tjerët, por ndryshon vetveten. Por ky nuk është qëllim në vetvete, sepse unë shoh një angazhim pozitiv edhe nga raportimet e sotme është e qartë që angazhimi është pozitiv, plus që sistemi ynë, i cili ka një komponent gjithmonë e më të zhvilluar digjital është një sistem që ka pasqyra, të cilat flasin vetë si të thuash, dhe nuk është thjeshtë se çfarë raporton njëri apo tjetri me fjalë, por janë pasqyra të verifikueshme të anëtarësisë, të takimeve, të boshllëqeve e kështu me radhë.

-Në zonën tuaj në Durrës do të angazhoheni personalisht me anëtarësimet e reja?

Rama: Normalisht ndarja e punës se të gjithë anëtarët e Asamblesë ka një mesatare prej 10 organizatash, kështu që edhe unë do të kem organizatat e mia. Por duke qenë një proces kombëtar ky do t’i kem takimet e organizatave të ndara sipas qarqeve. Kështu që, po do të jem në të gjitha qarqet, do të marr pjesë në mbledhjet e organizatave.

Top Channel