Analiza/ Refugjatët sirianë në Evropë dhe kthimi i tyre në Siri 24/12 17:20
Hamasi thotë se ka dhënë përgjigjen e tij ndaj një propozimi kornizë për një armëpushim të ri në Gaza.
Detajet e marrëveshjes, të përcaktuara nga Izraeli, SHBA, Katari dhe Egjipti, nuk janë bërë publike.
Më herët u raportua se përfshinte një armëpushim gjashtë-javor, kur më shumë pengje izraelite do të shkëmbeheshin për të burgosur palestinezë.
Izraeli dhe SHBA kanë thënë të dy se po shqyrtojnë përgjigjen e Hamasit.
Sekretari amerikan i Shtetit, Antony Blinken, i cili aktualisht ndodhet në Lindjen e Mesme, tha se do të diskutonte përgjigjen e Hamasit me zyrtarët në Izrael ditën e sotme.
Ndërsa Z. Blinken nuk ka dhënë asnjë tregues se si SHBA e shikon përgjigjen, Presidenti Joe Biden e përshkroi atë si “pak mbi krye” , duke sugjeruar se udhëheqja izraelite nuk do të pajtohet lehtësisht me atë që grupi po kërkon.
Një zyrtar i lartë i Hamasit i tha BBC-së se grupi kishte paraqitur një “vizion pozitiv” në përgjigje të kornizës, por kishte kërkuar disa ndryshime në lidhje me rindërtimin e Gazës, kthimin e banorëve të saj në shtëpitë e tyre dhe dispozitat për ata që kishin qenë të zhvendosur.
Zyrtari tha se Hamasi kishte kërkuar gjithashtu ndryshime në lidhje me trajtimin e të plagosurve, duke përfshirë kthimin e tyre në shtëpi dhe transferimin në spitale jashtë vendit.
Propozimi iu dërgua Hamasit rreth një javë më parë, por një përfaqësues i tha agjencisë së lajmeve Reuters se u ishte dashur deri të martën për t’u përgjigjur sepse pjesë të tij ishin “të paqarta”.
Kryeministri i Katarit Sheikh Mohammed Bin Abdulrahman al Thani e ka përshkruar përgjigjen e Hamasit si “pozitive” në përgjithësi.
Konflikti në Gaza u shkaktua nga një sulm i paprecedentë ndërkufitar nga persona të armatosur të Hamasit në jug të Izraelit më 7 tetor, në të cilin rreth 1,300 njerëz u vranë dhe rreth 250 të tjerë u morën peng.
Më shumë se 27,500 njerëz janë vrarë në Gaza që atëherë, sipas ministrisë së shëndetësisë në Rripin e Gazës, i cili është qeverisur nga Hamasi dhe i bllokuar nga Izraeli dhe Egjipti që nga viti 2007.
Hamasi është përshkruar si një organizatë terroriste në disa vende.
Gjatë një armëpushimi njëjavor në fund të nëntorit, 105 pengje izraelitë dhe të huaj u liruan në këmbim të 240 palestinezëve të mbajtur në burgjet izraelite.
Koha e çdo marrëveshjeje të re mund të komplikohet nga pretendimet e informuara në fillim të kësaj jave nga zyrtarët e mbrojtjes izraelite se ushtria “po bën përparim” në kërkimin e liderit të Hamasit në Gaza, Yahya Sinëar.
Megjithatë, kryeministri Benjamin Netanyahu është nën presion të madh të brendshëm për të siguruar lirimin e pengjeve të mbetura. Shtetet e Bashkuara po përpiqen gjithnjë e më shumë të frenojnë një përshkallëzim të zgjeruar rajonal pas sulmit me dron të javës së kaluar që vrau tre ushtarë amerikanë në Jordani.
Uashingtoni u kundërpërgjigj me sulme ajrore kundër milicive të mbështetura nga Irani në Siri dhe Irak dhe po paralajmëron se do të vijnë më shumë.
Një marrëveshje armëpushimi në Gaza shihet nga SHBA si mënyra më realiste për të ulur tensionet më tej. Të martën, Izraeli konfirmoi se 31 nga 136 pengjet e mbetura në Gaza ishin vrarë.
Kundëradmirali Daniel Hagari, një zëdhënës i Forcave të Mbrojtjes të Izraelit (IDF), tha se familjet e tyre ishin informuar dhe se autoritetet do të vazhdojnë të bëjnë presion për kthimin e robërve të mbetur.
“Ky është obligim moral, obligim kombëtar dhe obligim ndërkombëtar dhe kjo është busulla jonë dhe kështu do të vazhdojmë të veprojmë”, tha Hagari.
Top Channel
