Rreth 100 blegtorë nga rrethet e Jugut janë mbledhur për të protestuar sërisht në urën Kardhiqit në hyrje të aksit Kardhiq-Delvinë.
Ata pritet të takohen më pas me ministren e Bujqësisë, Anila Denaj, për t’i prezantuar katër pikat kryesore të protestës: rritjen e çmimit të shitjes së qumështit, dyfishimin e subvencioneve, sistemimin e lerave malore dhe mundësimin e kontratave 15 vjeçare për kullotat.
“Jemi në protestën e radhës pasi zotërinjtë e ministrisë na kanë lënë një takim por e kanë lënë në një moment të papërshtatshëm sepse kujtojnë se ne do të largohemi. Ata e kuptojnë profesionin tonë. Zonja ministre ka ardhur mesa kemi informacion, ndodhet në Tepelenë do të inaugurojë një thertore. Një rrugë e dy punë si i thonë. Nuk e di, do të vizitojë edhe një fermë në Dragot. Ne prapë do t’ja paraqesim ato 4 pika dhe në qoftë se ata nuk reagojnë do të na kenë në rrugë përsëri sepse kanë bërë edhe presion. Te shumë blektorë ka pasur presione. Mos dilni në protestë sepse do t’ju heqim kullotën, ke filanin në punë, ke fistekun. Me polici, kanë përdorur edhe Policinë e Shtetit. Unë dhe dy të tjerë jemi shoqëruar. Madje edhe na kanë intimiduar, na kanë thënë se juve ju tërheqin gazetarët dhe ju nxjerrin në rrugë. Në rrugë ne kemi dalë vetë për të drejtën tonë, nuk na kanë marrë gazetarët. Sot jemi në protestë, nuk tërhiqemi. Në Polici më kanë bërë presion, më kanë thënë që ti je organizatori, ti i nxjerr në rrugë. Unë nuk jam organizatori. Jam si të gjithë këta këtu”– tha njëri prej blektorëve.
Sipas tij, nëse këto 4 pika nuk zgjidhen ata do të shesin bagëtinë dhe do të largohen nga vendi.
“Ne kemi 4 pika zotëri i dashur. As për subvensionet as për kullotat as për veprat ujore. Nuk ka më kthim pas sepse ne po vuajmë si qeni. Nëse ata nuk na zgjidhin këto 4 pika, ne do t’i shesim dhe do të ikim nga ky vend sepse kjo është e qëllimshme”- tha blektori.
I pyetur se pse nuk ulen për të komunikuar me administratën, fermeri nënkuptoi se ky moment tashmë kishte kaluar dhe se takimi do të bëhet vetëm me ministren në prezencën e medies.
“Këtu nuk ka administratë. Administrata rri në zyra, të bëjë punën në zyra. S’ka punë administrate. Ku ka qenë administrata që të kujtohet për ne sot. Ku kanë qenë. Jemi të pranishëm këtu sot, madje ka edhe më shumë. Takim pa mediet e pranishme nuk ka, ja themi që tani ta dëgjojë sepse në Tepelenë është”- përfundoi blektori.
Top Channel
