Përplasjet në jug të Libanit, katër ushtarë izraelitë humbin jetën, plagosen dy të tjerë 31/03 09:12
Qeveria amerikane ka miratuar shitjen prej 23 miliardë dollarësh (18 miliardë paund) të 40 avionëve të rinj luftarakë F-16 në Turqi, një veprim që ishte vonuar gjatë, pasi Ankaraja ratifikoi pranimin e Suedisë në NATO.
Marrëveshja përfshin komplete modernizimi për 79 F-16 ekzistues turk. Departamenti Amerikan i Shtetit i tha Kongresit se kishte miratuar gjithashtu shitjen e 40 avionëve luftarakë F-35 në Greqi, me kosto 8.6 miliardë dollarë. Turqia ratifikoi pranimin e Suedisë në NATO pas më shumë se një viti vonesë, që shkaktoi tension në aleancë.
Për herë të parë, ajo bëri kërkesën për avionët në vitin 2021, por vonesa e saj në ratifikimin e ofertës suedeze për NATO-n doli të ishte një pengesë e madhe. Turqia ishte e shqetësuar për atë që e quajti mbështetjen e Suedisë për separatistët kurdë. Por deputetët turq ratifikuan ofertën e Suedisë këtë javë dhe presidenti turk Tajip Erdogan dha nënshkrimin e tij përfundimtar. Presidenti i SHBA Joe Biden më pas kërkoi që shitja e F-16 të miratohej “pa vonesë”. Pushtimi i plotë i Rusisë në Ukrainë në shkurt 2022 rriti rëndësinë e Turqisë si një mburojë e NATO-s në rajonin e Detit të Zi.
“Aprovimi im i kërkesës së Turqisë për blerjen e avionëve F-16 ka qenë i kushtëzuar nga miratimi i Turqisë për anëtarësimin e Suedisë në NATO”, tha senatori demokrat Ben Cardin, kryetar i Komisionit të Senatit për Marrëdhëniet me Jashtë, një nga katër komitetet kryesore që duhet të miratojë transferimet e armëve.
“Por mos bëni gabim: ky nuk ishte një vendim që e mora lehtë.”
Ai tha se rekordi i të drejtave të njeriut të Turqisë duhet të përmirësohet, si dhe të bëjë më shumë për ta mbajtur Rusinë përgjegjëse për pushtimin e saj në shkallë të plotë të Ukrainës. Tani Hungaria është i vetmi anëtar i NATO-s që ende nuk ka ratifikuar pranimin e Suedisë, megjithëse kohët e fundit ka pasur shenja përparimi. Vitin e kaluar, SHBA miratoi transferimin në Ukrainë të avionëve luftarakë F-16 të prodhimit amerikan nga Danimarka dhe Holanda, pasi pilotët ukrainas të trajnohen plotësisht për t’i operuar ato.
Top Channel
Përplasjet në jug të Libanit, katër ushtarë izraelitë humbin jetën, plagosen dy të tjerë 
