Seanca gjyqësore ndaj ish-ministrit, Arben Ahmetaj, i cili akuzohet për veprën e shpërdorimit të detyrës për çështjen e privatizimit të ish fabrikës së bukës u shty më 2 shkurt.
Këtë të enjte ish-ministri u përfaqësua nga avokati i tij.
Më 7 dhjetor të vitit që lamë pas, SPAK mori zyrtarisht të pandehur Arben Ahmetaj për veprën penale shpërdorim detyre për çështjen e privatizimit të ish-fabrikës “Buka” që sipas SPAK i ka shkaktuar shtetit një dëm prej 7 miliardë lekësh.
Mësohet se Prokuroria e Posaçme Kundër Korrupsionit dhe Krimit të Organizuar mbylli hetimet për ish-zv.kryeministrin Arben Ahmetaj. Po ashtu nën hetim janë dhe 6 ish-punonjës të Ministrisë së Financave.
Ish-ministri i Financave deklaroi nga arratia se në procedurën e privatizimit të fabrikës së bukës në zonën e ‘5 Majit’ në Tiranë, ka mbrojtur interesat e shtetit dhe nuk e ka shkelur detyrën.
Ndaj Arben Ahmetaj ka dhe një çështje tjetër të hapur në SPAK që lidhet me inceneratorët për të cilën ai u shpall në kërkim në muajin korrik të këtij viti për disa akuza, më e rënda prej atyre ajo e pastrimit të parave.
Kujtojmë se Ahmetaj si ish-ministër i Financave dhe Ekonomisë u vendos nën hetim për dosjet e inceneratorëve, pas këqyrjeve në një kompjuter që i përket biznesmenit Klodian Zoto, i cili rezultoi se kishte paguar e prenotuar udhëtime luksoze për ish funksionarin, vlera e të cilave u llogarit nga SPAK në shumën e 34 mijë eurove.
SPAK i referohet një sërë dëshmish të biznesmenëve që tregojnë se vilat në Palasë dhe në Hamallaj janë të lidhura me Arben Ahmetajn ndërkohë që nga një telefon blackberry i sekuestruar janë përftuar mesazhe dhe komunikime edhe me persona të tjerë, zyrtarë ish-zyrtarë dhe biznesmenë.
Pak ditë më parë Ahmetaj humbi dhe mandatin e deputetit, pasi prej gati 6 muajsh nuk u paraqit në Kuvend, ndërsa vendin e tij e zuri Plarent Ndreca.
Top Channel
